Major: ఓటీటీలోకి ‘మేజర్‌’.. స్ట్రీమింగ్‌ ఎప్పుడు, ఎక్కడంటే?

ఇంటర్నెట్‌ డెస్క్‌: అడివి శేష్‌ (Adivi Sesh) ప్రధాన పాత్ర పోషించిన ‘మేజర్‌’ (Major) సినిమా ఓటీటీలోకి వచ్చేస్తోంది. ఈ చిత్రం ‘నెట్‌ఫ్లిక్స్‌’ (Netflix)లో జులై 3 నుంచి స్ట్రీమింగ్‌ కానున్నట్టు సదరు సంస్థ సోషల్ మీడియా వేదికగా ప్రకటించింది. తెలుగు, మలయాళం, హిందీ భాషల్లో ఈ సినిమా ప్రసారంకానుంది. శశి కిరణ్‌ తిక్కా దర్శకత్వంలో రూపొందిన ఈ సినిమా జూన్‌ 3న థియేటర్లలో విడుదలై, ప్రేక్షకుల్లో స్ఫూర్తినింపింది. 26/11 ముంబయి ఉగ్రదాడుల్లో అమరుడైన వీర జవాను మేజర్‌ సందీప్‌ ఉన్నికృష్ణన్‌ బయోపిక్‌గా ఈ చిత్రం తెరకెక్కింది. సైనికుడిగా సందీప్‌ చేసిన సాహసాలతోపాటు ఆయన జీవన విధానాన్ని ఈ చిత్రంలో చూపించారు. ఆయన బాల్యం ఎలా గడిచింది? సైనికుడిగా ఎందుకు మారాలనుకున్నారు? ఈ ప్రయాణంలో ఆయన ఎదుర్కొన్న సమస్యలేంటి? తదితర అంశాలతో రూపొందిన ఈ సినిమాలో సందీప్‌ తల్లిదండ్రులుగా ప్రకాశ్‌రాజ్‌, రేవతి ఒదిగిపోయారు. నటుడిగా శేష్‌కు మంచి పేరొచ్చింది.