Yasoda: ఇక యశోద సినిమాలో ఆ పేరు కనిపించదు..!

హైదరాబాద్: ఇటీవల విడుదలై మంచి విజయాన్ని అందుకున్న సినిమా ‘యశోద’. ఈ సినిమాలో సమంత నటనపై సినీ విమర్శకులు కూడా ప్రశంసలు కురిపించారు.  ఈ చిత్రంలో ఇవా హస్పిటల్‌(EVA hospital) పేరు వాడటాన్ని వ్యతిరేకిస్తూ ఆస్పత్రి వర్గాలు ఇటీవల కోర్టును ఆశ్రయించిన సంగతి తెలిసందే. దీంతో కోర్టు ఈ విషయంలో స్పష్టత వచ్చే వరకు యశోద ఓటీటీ విడుదల ఆపేయాలని ఆదేశాలిచ్చింది. తాజాగా ఈ వ్యవహారం ఓ కొలిక్కి వచ్చింది. సినిమా మేకర్స్‌ ఇక పై ఇవా పేరు చిత్రంలో కనపడదు అని చెప్పారు.

యశోద నిర్మాత శివలెంక కృష్ణప్రసాద్‌ మాట్లాడుతూ..‘‘మేము చట్టప్రకారమే సమస్యను పరిష్కరించాం. ఈ సినిమాలో ఇవా అనే పేరును బ్లర్‌ చేస్తాం. ఈ పేరుతో ఆస్పత్రి ఉందని తెలీదు. ఇది పూర్తిగా యాదృచ్ఛికంగా జరిగింది. ఎవరినీ కించపరచడం మా ఉద్దేశం కాదు. ఈ విషయం మా దృష్టికి వచ్చిన తర్వాత మేము సినిమాలో ఆస్పత్రి పేరును బ్లర్‌ చేసి, పేరు వినిపించే చోట మ్యూట్‌ చేశాం. అన్ని సాంకేతిక సమస్యలను దృష్టిలో పెట్టుకొని మేము ఈ విషయాన్ని పరిష్కరించడానికి వారం రోజులు సమయం అడిగాం. ఓటీటీలో యశోద సినిమా ప్రసారం అయ్యేటప్పుడు ఈ లోగోలు, పేరు ఉండవు. మూడు వారాల నుంచి ఈ సినిమా థియేటర్లలో విజయవంతంగా అలరిస్తోంది. ఇక ఈ చిత్రం ఓటీటీలోకి ఎప్పుడొస్తుందనే విషయం మేము వచ్చే నెలలో ప్రకటిస్తాం. ఈ వ్యవహరాన్ని పరిష్కరించేందుకు సహకరించిన ఇవా హస్పిటల్‌ యాజమాన్యానికి ధన్యవాదాలు’’ అని చెప్పారు.