బాలీవుడ్‌ ‘యుధ్రా’లో  మాళవికా మోహన్‌ 

ఇంటర్‌నెట్‌ డెస్క్‌: ‘మాస్టర్’‌ చిత్రంలో విజయ్‌ సరసన కథానాయికగా అలరించిన నటి మాళవికా మోహన్‌. ఈ అందాల భామ బాలీవుడ్‌లో రవి ఉదయవార్‌ దర్శకత్వంలో తెరకెక్కనున్న ‘యుధ్రా’ అనే చిత్రంలో నాయికగా నటిస్తోంది. ‘గల్లీ బాయ్’ నటుడు సిద్ధాంత్‌ చతుర్వేది కథానాయకుడు. తాజాగా ఈ సినిమా గురించి నిర్మాణ సంస్థ తన ట్విటర్‌లో ప్రకటించింది. ఎక్సెల్‌ ఎంటర్‌టైన్‌మెంట్‌ ప్రొడక్షన్‌లో రూపొందుతున్న చిత్రానికి రితేష్‌ సిధ్వాని, ఫర్హాన్‌ అక్తర్‌ నిర్మాతలు. యాక్షన్, థ్రిల్లర్‌ నేపథ్యంగా రూపొందుతున్న ఇందులో మాళవికా - సిద్ధాంత్‌ కలిసి నటించడం ఇదే తొలిసారి. సినిమాకి సంబంధించిన వీడియోను కూడా ఈరోజు విడుదల చేశారు. వచ్చే ఏడాది వేసవిలోనే చిత్రాన్ని ప్రేక్షకుల ముందుకు తీసుకురానున్నారు. మాళవిక గతంలో రజనీకాంత్‌తో కలిసి ‘పేట’ చిత్రంలో కనువిందు చేసింది. సిద్ధాంత్‌ ప్రస్తుతం కత్రీనా కైఫ్‌తో కలిసి ‘ఫోన్‌ బూత్’‌ చిత్రంలో నటిస్తున్నారు.