Actor Anicka: అదే నా జీవితంలో చివరి రాత్రి అనుకున్నా.. మాజీ ప్రియుడు వేధింపులు బయటపెట్టిన నటి

ఇంటర్నెట్‌ డెస్క్‌: ప్రముఖ నటి అనికా విక్రమన్‌ (Anicka Vikhraman) తన మాజీ ప్రియుడిపై ఆరోపణలు చేసింది. తనను ఎంతగానో వేధించేవాడని తెలిపింది, తనను మానసికంగా, శారీరకంగా హింసించేవాడని ఆరోపించింది. ఇప్పటికీ అతడు తనని బెదిరిస్తున్నాడని ఆవేదన వ్యక్తం చేసింది. ఈ మేరకు  దాడిలో గాయపడిన ఫొటోలను సోషల్‌మీడియాలో పంచుకుంది. అవి చూసిన నెటిజన్లు ఆశ్చర్యపోతున్నారు.

‘‘నేను అనూప్‌ పిళ్లై (Anoop Pillai) అనే వ్యక్తిని ప్రేమించాను. నన్ను ఒకప్పుడు ఎంతగానో ప్రేమించిన వ్యక్తి అలా వేధిస్తాడని ఎప్పుడూ అనుకోలేదు. అతడు నాపై రెండోసారి చేయి చేసుకున్నప్పుడు పోలీసులకు ఫిర్యాదు చేశాను. కానీ అతడు పోలీసులతో మాట్లాడి సమస్య పరిష్కారమైందని చెప్పాడు. నేను షూటింగ్‌లకు వెళ్లకుండా నిర్బంధించాడు. నాకు కాల్స్‌ రాకుండా చేయాలని నా ఫోన్‌ పగలగొట్టాడు. నా వాట్సాప్‌ సందేశాలపై నిఘా పెట్టాడు. నేను తనని వదలి వచ్చేసే ముందు నా ఫోన్‌ ఇచ్చేయాలని వేడుకున్నా ఇవ్వలేదు. అతడు స్పృహ కోల్పోయేంతగా కొట్టేవాడు. అతడు కొట్టిన దెబ్బలకు నా జీవితంలో అదే చివరి రాత్రి అనుకున్నా. నా ముఖమంతా వాచిపోయేలా కొట్టి..‘ఈ ముఖంతో నువ్వు ఎలా నటిస్తావో చూస్తా’ అని అనేవాడు. నేను ఆ దెబ్బలకు ఏడుస్తుంటే డ్రామా చేస్తున్నానంటూ వెక్కిరించేవాడు. నేను బాధపడుతుంటే అతడు తన స్నేహితులతో కలిసి పార్టీ చేసుకునే వాడు’’ అని పేర్కొంది. ఆమె షేర్‌ చేసిన ఫొటోలు ఇప్పుడు వైరల్‌గా మారాయి.