Chiranjeevi: ఆరు వేల మంది విద్యార్థులతో ‘వాల్తేరు వీరయ్య’ రూపం.. విజువల్స్‌ అద్భుతం

హైదరాబాద్‌: అగ్ర కథానాయకుడు చిరంజీవి (Chiranjeevi) నటిస్తోన్న యాక్షన్‌ ఎంటర్‌టైనర్‌ చిత్రం ‘వాల్తేరు వీరయ్య’ (Waltair Veerayya). బాబీ దర్శకుడు. దీపావళి పర్వదినాన్ని పురస్కరించుకుని విడుదల చేసిన ఈ సినిమా టైటిల్‌, చిరు ఫస్ట్‌ లుక్‌ సినీ ప్రియుల్ని ఆకట్టుకున్న విషయం తెలిసిందే. ఆ లుక్‌నే రీ క్రియేట్‌ చేసి చిరంజీవిపై ఉన్న ఉన్న అభిమానాన్ని చాటారు మల్లారెడ్డి విశ్వవిద్యాలయం విద్యార్థులు. తమ యూనివర్శిటీ మైదానంలో ‘వాల్తేరు వీరయ్య’ లుక్‌ డ్రా చేసి.. ఆ ఆకారంలో సుమారు ఆరు వేలమంది కూర్చొన్నారు. సంబంధిత విజువల్స్‌ను చిత్రీకరించి.. శనివారం సాయంత్రం తమ విశ్వవిద్యాలయంలో నిర్వహించిన ‘క్యాన్సర్‌పై పోరాటం’ కార్యక్రమానికి ముఖ్య అతిథిగా వెళ్లిన చిరంజీవిని సర్‌ప్రైజ్‌ చేస్తూ ఆ వీడియోను ప్లే చేశారు. వీడియో చూసిన చిరు మురిసిపోయారు. తనపై ప్రేమ కురిపించిన వారందరికీ ధన్యవాదాలు చెప్పారు.

ఆ వీడియోను చిత్ర దర్శకుడు బాబీ ట్విటర్‌ వేదికగా ఆదివారం షేర్‌ చేశారు. ‘వావ్‌, అదుర్స్‌’ అంటూ నెటిజన్లు కామెంట్‌ చేస్తున్నారు. సినిమా అప్‌డేట్స్‌ కావాలని దర్శకుడిని కోరుతున్నారు. రవితేజ కీలక పాత్ర పోషిస్తున్న ఈ చిత్రంలో శ్రుతిహాసన్‌ కథానాయిక. 2023 సంక్రాంతికి ఈ సినిమాని విడుదల చేసేందుకు దర్శకనిర్మాతలు సన్నాహాలు చేస్తున్నారు.