Mammootty: సోషల్‌మీడియా వేదికగా క్షమాపణలు చెప్పిన స్టార్‌ హీరో..

హైదరాబాద్‌: మలయాళ మెగాస్టార్‌ మమ్ముట్టి(Mammootty) సోషల్‌మీడియా వేదికగా నెటిజన్లకు క్షమాపణలు చెప్పారు. తాను చేసిన తప్పును తెలియజేసినందుకు ధన్యవాదాలు తెలిపారు. అసలు విషయమేమిటంటే.. 2018లో కేరళలో సంభవించిన వరదల ఆధారంగా  ‘2018’ అనే చిత్రం రూపొందుతోంది. టాలెంటెడ్‌ డైరెక్టర్‌ జూడో ఆంథనీ జోసెఫ్‌( Jude Anthany Joseph) ఈ సినిమాకు దర్శకత్వం వహిస్తున్నారు. ఇక ఈ సినిమా టీజర్ లాంఛ్‌ వేడుకలో మమ్ముట్టి దర్శకుడిని ఉద్దేశిస్తూ చేసిన వ్యాఖ్యలను కొందరు నెటిజన్లు తప్పుపట్టారు.

లాంఛ్‌ ఈవెంట్‌లో మమ్ముట్టి మాట్లాడుతూ ‘జూడో తలపై వెంట్రుకలు లేకపోయినా, అద్భుతమైన మెదడు ఉన్న ప్రతిభావంతుడైన దర్శకుడు’ అని అన్నారు. అయితే ఈ కామెంట్స్‌పై నెటిజన్ల నుంచి తీవ్రస్థాయిలో విమర్శలు వెల్లువెత్తాయి. ఇలా మాట్లాడడం బాడీ షేమింగ్‌తో సమానమంటూ పోస్టులు చేశారు. దీనిపై మమ్ముట్టి క్షమాపణలు చెబుతూ తన అధికారిక సోషల్‌ మీడియాలో పోస్టు పెట్టారు. ‘డియర్‌ ఆల్‌... నిన్న జరిగిన ‘2018’ టీజర్‌ లాంఛ్‌ ఈవెంట్‌లో దర్శకుని ప్రశంసించేందుకు నేను వాడిన కొన్ని పదాలు మిమ్మల్ని బాధపెట్టాయని తెలిసింది. ఉత్సాహంతో అలాంటి మాటలు మాట్లాడినందుకు క్షమించండి. మరోసారి ఇలా జరగకుండా జాగ్రత్త పడతాను. ఈ తప్పును గుర్తుచేసినందుకు మీ అందరికీ ధన్యవాదాలు’ అని రాశారు.