Mamta Mohandas: మరో హీరోయిన్‌ ఉంటే షూట్‌కు రానంది.. నయన్‌పై మమత పరోక్ష ఆరోపణలు

ఇంటర్నెట్‌డెస్క్‌: అగ్ర కథానాయిక నయనతార(Nayanthara)పై నటి మమతా మోహన్‌దాస్‌ (Mamta Mohandas) పరోక్షంగా షాకింగ్‌ కామెంట్స్ చేశారు. ఓ సినిమా విషయంలో నయన్‌ కోసం చిత్రబృందం చేసిన పని వల్ల తాను బాధపడినట్లు తాజాగా ఇచ్చిన ఓ ఇంటర్వ్యూలో ఆమె వెల్లడించారు. ఆ సినిమా కోసం తాను నాలుగు రోజులు వృథా చేసుకున్నట్లు చెప్పారు.

‘‘రజనీకాంత్‌ (Rajinikanth) నటించిన ఓ సినిమాలో నాకు అవకాశం వచ్చింది. అందులో పాట కోసం నన్ను సంప్రదించారు. సుమారు నాలుగు రోజులపాటు షూట్‌ చేశాం. షూట్‌ చేస్తున్నప్పుడే అర్థమైంది.. ఆ ఫ్రేమ్‌లో నేను లేనని. తీరా ఫైనల్‌ కాపీ బయటకు వచ్చేసరికి నా షాట్స్‌ ఏమీ లేవు. కేవలం ఒకే ఒక్క షాట్‌లో వెనుక నుంచి కనిపిస్తా. నాకు చెప్పినవిధంగా ఆ పాటను చిత్రీకరించలేదు. అయితే, ఆ సినిమాలో ఎవరైతే హీరోయిన్‌గా నటించారో ఆమె వల్లే అలా జరిగినట్లు కొంతకాలం తర్వాత నాకు తెలిసిన వాళ్లు చెప్పారు. ఆ పాటలో మరో హీరోయిన్‌ ఉందనే సమాచారం తనకు లేదంటూ తాను షూట్‌కు రానని ఆమె చెప్పిందని.. అందుకే నా పార్ట్‌ను చిత్రీకరించలేదని చెప్పారు. ఆ సినిమా కోసం 4 రోజులు వృథా చేసుకున్నా. ఈ మొత్తం వ్యవహారం వల్ల ఎంతో బాధగా అనిపించింది’’ అని మమతా మోహన్‌దాస్‌ అన్నారు.

రజనీకాంత్‌ - నయనతార జంటగా నటించిన చిత్రాల్లో ‘కథానాయకుడు’ ఒకటి. 2008లో విడుదలైన ఈ సినిమాలో మమతా మోహన్‌దాస్‌ అతిథి పాత్రలో కనిపించారు. ఇందులోని ‘‘దేవుడే స్వర్గం నుంచి’’ అనే పాటలో ఆమె ఓ చోట తళుక్కున మెరిశారు. తాజాగా మమత వ్యాఖ్యలు నెట్టింట వైరల్‌గా మారిన తరుణంలో ఆమె మాట్లాడేది ‘కథానాయకుడు’, నయనతార గురించేనని నెటిజన్లు అనుకుంటున్నారు.