Manchu Manoj: నాలుగేళ్ల ప్రేమ ఫలించినందుకు సంతోషంగా ఉన్నా: మనోజ్‌

హైదరాబాద్‌: తన నాలుగేళ్ల ప్రేమ ఫలించి.. భూమా మౌనికా రెడ్డి(Mounika Reddy)తో వివాహం జరిగినందుకు సంతోషంగా ఉన్నానని నటుడు మంచు మనోజ్‌ (Manchu Manoj) అన్నారు. సోమవారం ఉదయం భార్య, ఇతర కుటుంబసభ్యులతో కలిసి తిరుమల శ్రీవారిని దర్శించుకున్న ఆయన మీడియాతో మాట్లాడారు. రానున్న రోజుల్లో సినిమాలపై పూర్తిగా దృష్టి పెట్టనున్నట్లు చెప్పారు.

‘‘జీవితంలో ఏదైనా ఓడిపోవచ్చు. కానీ, ప్రేమ గెలవాలి. దాన్ని నేను ఎప్పటికీ నమ్ముతాను. ఎందుకంటే ప్రేమే గెలిచింది. 12 ఏళ్ల నుంచి మౌనిక నాకు తెలుసు. నాలుగేళ్ల క్రితం నేను వేరే లోకంలో ఉన్నప్పుడు తనే నాకు అండగా నిలిచింది. అలా, మేమిద్దరం మరింత చేరువయ్యాం. ఎన్నో వ్యతిరేకతలు ఎదురైనప్పటికీ ధైర్యంగా నిలబడ్డాం. దేవుడి దయ వల్లే అందరూ కలిసి మా పెళ్లి చేశారు. బాబు నా జీవితంలోకి రావడం కూడా శివుడి ఆజ్ఞగానే భావిస్తా. ప్రజలకు సేవ చేయాలనే ఉద్దేశం మా ఇద్దరికీ ఉంది. మా ఇద్దరి అభిప్రాయాలు ఒక్కటే. అయితే, నాకు రాజకీయాల్లోకి రావాలని లేదు. వాటిపై ఆమెకు ఆసక్తి ఉంటే నేను అండగా ఉంటా’’ అని మనోజ్‌ వివరించారు. 2019లో ప్రణతీరెడ్డి నుంచి విడాకులు తీసుకున్న మనోజ్‌ తాజాగా మౌనికా రెడ్డిని పెళ్లి చేసుకున్నారు. కుటుంబసభ్యుల సమక్షంలో హైదరాబాద్‌లో వీరి వివాహం వేడుకగా జరిగింది.