Maniratnam: మీటూనా..? టాలెంటా? బిగ్గెస్ట్ మూవీలో వైరముత్తు ఎందుకు భాగం కాలేదు..!

చెన్నై: కోలీవుడ్‌లో తెరకెక్కిన ఎన్నో హిట్‌ చిత్రాలకు పాటల రచయితగా పనిచేసి పేరు ప్రఖ్యాతలు సొంతం చేసుకున్నారు వైరముత్తు (Vairamuthu). ప్రముఖ దర్శకుడు మణిరత్నం తెరకెక్కించిన పలు చిత్రాలకు ఆయన అందించిన సాహిత్యం సినీ ప్రియుల్ని ఆకట్టుకుంది. అయితే, ఆయన రూపొందించిన కొత్త చిత్రం ‘పొన్నియిన్‌ సెల్వన్‌’లో మాత్రం వైరముత్తు భాగం కాలేదు. ‘మీటూ’ ఆరోపణల కారణంగానే వైరముత్తును దూరం పెట్టారా..? అనే చర్చ జరుగుతోంది. దీనిపై తాజాగా మణిరత్నం స్పందించారు.

‘‘వైరముత్తు టాలెంట్‌ విషయంలో ఎలాంటి సందేహం లేదు. కరుణానిధి సైతం గతంలో వైరముత్తు టాలెంట్‌ని గుర్తించి మెచ్చుకున్నారు. నేనిప్పటికీ ఆయనతో కలిసి ఎన్నోసార్లు పనిచేశా. ఆయన కవిత్వాన్ని నా సినిమాల్లో ఉపయోగించా. ఆయనొక అద్భుతం. అయితే, వైరముత్తును మించిన కొత్త టాలెంట్‌ కూడా పరిశ్రమలో ఉంది. కొత్తవాళ్లకీ ప్రోత్సాహం అందించాలి’’ అని మణిరత్నం చెప్పుకొచ్చారు.

వైరముత్తు తమను వేధింపులకు గురి చేశాడంటూ గతంలో ఎంతోమంది మహిళలు ‘మీటూ’ వేదికగా తమ గళం విప్పారు. ప్రముఖ గాయని చిన్మయి సైతం ఆయనపై ఆరోపణలు చేశారు. ఈ క్రమంలోనే వైరముత్తుతో పనిచేసేందుకు పలువురు సినీ ప్రముఖులు వెనకాడుతున్నట్లు గతంలో కోలీవుడ్‌లో వార్తలు చక్కర్లు కొట్టాయి.