VT13: మెగా హీరోతో మాజీ ప్రపంచ సుందరి.. వీడియో రిలీజ్‌ చేసిన టీం

హైదరాబాద్‌: విభిన్నమైన కథలు ఎంచుకుంటూ మంచి సినిమాలు చేస్తూ పేరు తెచ్చుకున్నాడు మెగా హీరో వరుణ్‌ తేజ్‌ (Varun Tej). ఈ యంగ్‌ హీరో తాజాగా శక్తి ప్రతాప్‌ సింగ్‌ (Shakti Pratap Singh) దర్శకత్వంలో ఓ సినిమాలో నటిస్తున్నాడు. ఇంకా పేరు ఖరారు కాని ఈ సినిమా VT13గా ప్రచారంలో ఉంది. ఈ సినిమాలో వరుణ్‌ సరసన మాజీ ప్రపంచ సుందరి నటించనుందని వార్తలు వచ్చాయి. తాజాగా వాటిని నిజం చేస్తూ చిత్రబృందం వీడియో విడుదల చేసింది. 

ఈ ప్రాజెక్ట్‌లో మాజీ మిస్‌ యూనివర్స్‌ మానుషి చిల్లర్ (Manushi Chhillar)‌‌ హీరోయిన్‌గా నటించనుందని మేకర్స్‌ తెలియజేశారు. ఇందులో మానుషి ఓ ఆఫీసర్‌ పాత్రలో అలరించనుంది. ఈ విషయంపై ఆమె మాట్లాడుతూ..‘‘ఇంత గొప్ప సినిమాలో నేనూ భాగమవుతున్నందుకు ఎంతో సంతోషంగా ఉంది. ఈ చిత్రంలో అద్భుతమైన యాక్షన్‌ సన్నివేశాలు ఉన్నాయి. ఈ స్క్రిప్ట్‌ చదివాక ఇండియన్‌ ఎయిర్‌ ఫోర్స్‌ ఆఫీసర్స్‌ జీవితాలు ఎలా ఉంటాయో తెలుసుకోవాలని ఆసక్తి ఎక్కువైంది. నాకు ఈ  అవకాశం ఇచ్చినందుకు దర్శకుడు శక్తి ప్రతాప్‌ సింగ్‌కు కృతజ్ఞతలు. వరుణ్‌తో కలిసి నటించేందుకు ఆసక్తిగా  ఎదురుచూస్తున్నాను’’ అని తెలిపింది. అలాగే వరుణ్‌ కూడా ఆమెకు వెల్‌కమ్‌ చెబుతూ ట్వీట్‌ చేశాడు.

ఇక భారీ బడ్జెట్‌తో తెరకెక్కుతోన్న ఈ సినిమాతో వరుణ్‌ బాలీవుడ్‌లోకి ఎంట్రీ ఇవ్వనుండగా.. మానుషి తెలుగు తెరకు పరిచయమవ్వనుంది. యథార్థ సంఘటనల ఆధారంగా ఇది తెరకెక్కనుంది. వైమానిక దళం ఎదుర్కొనే సవాళ్లను ఇందులో చూపనున్నారు. తెలుగు, హిందీ భాషల్లో రానున్న ఈ సినిమా షూటింగ్‌ ఇప్పటికే ప్రారంభమైన విషయం తెలిసిందే.