Masooda: అసలు భయం ముందుంది!

‘మళ్లీరావా’, ‘ఏజెంట్‌ సాయి శ్రీనివాస ఆత్రేయ’ వంటి విజయవంతమైన చిత్రాలతో ప్రేక్షకుల్ని మెప్పించిన నిర్మాణ సంస్థ స్వధర్మ్‌ ఎంటర్‌టైన్‌మెంట్‌. ఇప్పుడీ సంస్థ నుంచి వస్తున్న మూడో చిత్రం ‘మసూద’ (Masooda). సంగీత, తిరువీర్‌, కావ్య కల్యాణ్‌రామ్‌, శుభలేఖ సుధాకర్‌ తదితరులు ప్రధాన పాత్రల్లో నటించారు. ఈ సినిమా ఈనెల 18న ప్రేక్షకుల ముందుకు రానుంది. ఈ నేపథ్యంలోనే చిత్ర ట్రైలర్‌ను హీరో విజయ్‌ దేవరకొండ (Vijay Deverakonda) శనివారం విడుదల చేశారు. ‘‘భవిష్యత్‌ అనేది మనం ఈరోజు ఏం చేస్తున్నామో దాని మీద ఆధారపడి ఉంటుంది’’ అంటూ సంగీత చెబుతున్న డైలాగ్‌తో మొదలైన ట్రైలర్‌ ఆద్యంతం ఉత్కంఠభరితంగా సాగింది. తల్లీకూతుళ్ల అనుబంధాలు, వారి మధ్యతరగతి కష్టాలు, స్నేహం, ప్రేమ వంటి కోణాల్ని స్పృశిస్తూ సాగిన ప్రచార చిత్రం.. ఆఖర్లో హారర్‌ అంశాలతో ఆసక్తి రేకెత్తించింది. ‘‘అప్పుడే భయపడాల్సిన అవసరం లేదు.. అసలు భయం ముందుంది’’ అంటూ చిత్ర బృందం చెప్పిన తీరు చూస్తుంటే.. సినిమాలో హారర్‌ అంశాలకు పెద్ద పీట వేసినట్లు అర్థమవుతోంది. ఈ చిత్రాన్ని తెలుగు రాష్ట్రాల్లో ఎస్వీసీ పతాకంపై విడుదల చేస్తున్నారు నిర్మాత దిల్‌రాజు.