Chiranjeevi: సుకుమార్‌ డైరెక్షన్‌లో మెగాస్టార్‌.. ఫొటో షేర్‌ చేసిన చిరు

హైదరాబాద్‌: ‘గాడ్ ఫాదర్‌’, ‘భోళాశంకర్‌’.. ఇలా వరుస సినిమాలు చేస్తూ కెరీర్‌లో ఫుల్‌ బిజీగా ఉన్నారు అగ్రకథానాయకుడు, మెగాస్టార్‌ చిరంజీవి. షూటింగ్స్‌ నుంచి ఏ మాత్రం విరామం దొరికినా ఆయన మరో పనిలో నిమగ్నమవుతున్నారు. అందుకు నిదర్శనమే ఈ ఫొటో. ప్రస్తుతం ‘ఆచార్య’ ప్రమోషన్స్‌తోపాటు మోహన్‌రాజా, మెహర్‌ రమేశ్‌, బాబీ చిత్రాల షూట్‌లో ఉన్న చిరంజీవి తాజాగా స్టార్‌ డైరెక్టర్‌ సుకుమార్‌తో కలిసి వర్క్‌ చేశారు. అయితే, వీళ్లిద్దరూ కలిసి పనిచేసింది సినిమా కోసం కాదు.. ఓ యాడ్‌ షూట్‌ కోసమే. ఓ ప్రముఖ రియల్‌ ఎస్టేట్‌ సంస్థ ప్రకటన కోసం చిరంజీవి రంగంలోకి దిగగా.. సుకుమార్‌ ఆ యాడ్‌ని రూపొదించారు. ఈ విషయాన్ని తెలియజేస్తూ తాజాగా చిరు కొన్ని ఫొటోలు షేర్‌ చేశారు. సుకుమార్‌ టాలెంట్‌ని మెచ్చుకున్నారు. ‘‘దర్శకుడిగా సుకుమార్‌ ప్రతిభ అందరికీ తెలిసిందే. ఓ యాడ్‌ఫిల్మ్‌ కోసం ఆయన దర్శకత్వంలో నేను నటించాను. షూట్‌ని ఎంతగానో ఎంజాయ్‌ చేశా’’ అని చిరు తెలిపారు.