Chiranjeevi: ఆ దర్శకుడి దగ్గర పనిచేయడం నా అదృష్టం..

కళాతపస్వి కె.విశ్వనాథ్‌ 92వ పుట్టిన రోజు సందర్భంగా చిరు ట్వీట్‌

ఇంటర్నెట్‌ డెస్క్: దిగ్గజ దర్శకుడు, క‌ళాత‌ప‌స్వి కె.విశ్వనాథ్ నేడు 92వ పుట్టిన రోజు జరుపుకొంటున్నారు. ఈ సంద‌ర్భంగా.. ఆయ‌న‌కు మెగాస్టార్ చిరంజీవి ట్విటర్‌ వేదికగా శుభాకాంక్షలు తెలియజేశారు. ‘‘గురు తుల్యులు, కళా తపస్వి కె.విశ్వనాథ్‌గారికి జన్మదిన శుభాకాంక్షలు! తెలుగు జాతి, తెలుగు సినిమా ఖ్యాతిని ప్రపంచవ్యాప్తం చేసి.. తెలుగు సినిమా చ‌రిత్ర.. శంక‌రాభ‌ర‌ణం ముందు, శంక‌రాభ‌ర‌ణం త‌ర్వాత అనేలా చేసిన మీరు తెలుగు వారంద‌రికీ అందిన వ‌రం. మీ చిత్రాలు అజ‌రామ‌రం. మీ దర్శకత్వంలో న‌టించ‌డం నా అదృష్టం. మీరు క‌ల‌కాలం ఆయురారోగ్యాల‌తో సంతోషంగా ఉండాల‌ని ఆ భ‌గ‌వంతుడిని కోరుకుంటున్నాను’’ అని అన్నారు.

విశ్వనాథ్‌ దర్శకత్వంలో చిరంజీవి మూడు సినిమాల్లో నటించారు. చిరు కెరీర్ ప్రారంభంలో ‘శుభ‌లేఖ’ను తెరకెక్కించారు. ఆపై మాస్ హీరోగా  గుర్తింపు పొందాక.. ‘స్వయంకృషి’ చేశారు. ఇందులో చెప్పులు కుట్టే సాంబయ్యగా కనిపించారు. ఆపాత్రను అంత సహజంగా మలిచిన తీరు విశ్వనాథ్‌కే సొంతం. ఆ త‌ర్వాత ‘ఆప‌ద్బాంధ‌వుడు’లో మాధవ అనే పాత్రలో నటించారు. విశ్వనాథ్‌కు మరికొంత మంది సినీ ప్రముఖులు సామాజిక మాధ్యమాల వేదికగా శుభాకాంక్షలు తెలిపారు.