Chiranjeevi: వింటేజ్‌ మాస్‌ లుక్‌లో మెగాస్టార్.. థియేటర్లు దద్దరిల్లిపోవడం ఖాయం అంటోన్న ఫ్యాన్స్

హైదరాబాద్‌: మెగా అభిమానులందరూ ఎప్పుడెప్పుడా అని ఎదురుచూస్తోన్న దీపావళి స్పెషల్‌ ధమాకా వచ్చేసింది. పండగ పర్వదినాన్ని పురస్కరించుకుని మెగాస్టార్‌ చిరంజీవి (Chiranjeevi) నటిస్తోన్న 154వ ప్రాజెక్ట్‌ నుంచి సర్‌ప్రైజ్‌ విడుదలైంది. బాబీ (Bobby) దర్శకత్వం వహిస్తోన్న ఈ సినిమా టైటిల్‌ టీజర్‌, చిరు ఫస్ట్‌లుక్‌ని చిత్రబృందం సోమవారం ఉదయం విడుదల చేసింది. ముందు నుంచి చెప్పినట్లుగానే ఈ చిత్రానికి ‘వాల్తేరు వీరయ్య’ (Waltair Veerayya) అనే టైటిల్‌ ఖరారు చేశారు.

ఇక, మెగాస్టార్‌ లుక్‌ విషయానికి వస్తే.. లుంగీ కట్టుకుని, ఉంగరాలు, కడియం, చెవి పోగుతో ఊరమాస్‌ గెటప్‌లో దర్శనమిచ్చారు. ప్రస్తుతం ఈ వీడియో నెట్టింటిని షేక్‌ చేస్తోంది. దీనిని చూసిన నెటిజన్లు.. చిరంజీవి నటించిన ఒకప్పటి మాస్‌ చిత్రాలను గుర్తు చేసుకుంటున్నారు. ఈసారి థియేటర్లు దద్దరిల్లిపోవడం ఖాయం అంటున్నారు. విభిన్నమైన మాస్‌ కథాంశంతో రూపుదిద్దుకుంటోన్న ఈ సినిమాలో చిరుకు జోడీగా శ్రుతిహాసన్‌ కనిపించనున్నారు. రవితేజ కీలకపాత్ర పోషిస్తున్నారు. దేవిశ్రీ ప్రసాద్‌ స్వరాలు అందిస్తున్నారు. మైత్రి మూవీ మేకర్స్‌ పతాకంపై ఈ సినిమా నిర్మితమవుతోంది. సంక్రాంతి కానుకగా ఈసినిమా విడుదల కానుంది.