KGF Chapter 2: ‘కేజీయఫ్‌’.. మరో సర్‌ప్రైజ్‌ వచ్చింది!

ఇంటర్నెట్‌ డెస్క్‌: పాన్‌ ఇండియా చిత్రం ‘కేజీయఫ్‌ ఛాప్టర్‌ 2’ గురువారం బాక్సాఫీసు ముందుకొచ్చి హిట్‌ టాక్ సొంతం చేసుకుంది. ఈ సందర్భంగా చిత్ర బృందం ‘మెహబాబా’ అంటూ సాగే పాటను ప్రేక్షకులకు కానుకగా అందించింది. నాయకానాయికల ప్రేమ నేపథ్యంలో రూపొందిన ఈ గీతం అన్ని వర్గాల శ్రోతలను అలరించేలా ఉంది. ఈ పాట తెలుగు వెర్షన్‌కు రామజోగయ్య శాస్త్రి సాహిత్యం అందించగా అనన్య భట్‌ ఆలపించారు. రవి బస్రూర్‌ స్వరాలు సమకూర్చారు.

‘కేజీయఫ్‌ 2’ను యశ్‌ హీరోగా దర్శకుడు ప్రశాంత్‌ నీల్‌ తెరకెక్కించారు. శ్రీనిధి శెట్టి కథానాయిక. గతంలో ఇదే కాంబినేషన్‌లో ఘన విజయం అందుకున్న ‘కేజీయఫ్‌ ఛాప్టర్‌ 1’కు కొనసాగింపుగా వచ్చింది. యశ్ నటనకు, ప్రశాంత్‌ నీల్‌ టేకింగ్‌కు ప్రేక్షకులు మంచి మార్కులు వేస్తున్నారు. హోంబలే ఫిల్మ్స్‌ పతాకంపై విజయ్‌ కిరంగదూర్‌ నిర్మించిన ఈ సినిమాలో బాలీవుడ్‌ నటులు సంజయ్‌ దత్‌, రవీనా టాండన్, ప్రకాశ్‌రాజ్‌, రావు రమేశ్‌ తదితరులు కీలక పాత్రలు పోషించారు.