ఘనంగా మెహరీన్‌ నిశ్చితార్థం

ఇంటర్నెట్‌ డెస్క్: తెలుగు, తమిళ చిత్రాల్లో కథానాయికగా తనకంటూ ప్రత్యేక గుర్తింపు తెచ్చుకున్న నటి మెహరీన్‌. తాజాగా ఈ అందాల భామ నిశ్చితార్థం ఆమె ప్రియుడు భవ్య బిష్ణోయ్‌తో ఘనంగా జరిగింది. జైపూర్‌లోని ఓ కోట వీరి నిశ్చితార్థ వేడుకకు వేదికైంది. ఇందుకు సంబంధించిన ఫొటోలను తన ఇన్‌స్టా స్టోరీస్‌లో పంచుకుంది మెహరీన్‌. ఈ ఏడాది చివరిలో వీరి వివాహం జరగనుందని సమాచారం.

మెహరీన్‌కు కాబోయే వరుడు భవ్య బిష్ణోయ్ హరియాణ మాజీ ముఖ్యమంత్రి భజన్‌లాల్‌కి మనవడు. గతేడాది లాక్‌డౌన్ సమయంలో తన ప్రేమ విషయాన్ని మెహరీన్‌ తెలియజేసింది. నాని కథానాయకుడిగా నటించిన ‘కృష్ణగాడి వీరప్రేమ గాథ’ చిత్రంతో మెహరీన్‌ తెలుగుతెరకు పరిచయమైన సంగతి తెలిసిందే. ఆ తర్వాత ‘మహానుభావుడు’, ‘రాజా ది గ్రేట్‌’, ‘ఎఫ్‌2’ తదితర సూపర్‌హిట్‌ చిత్రాలతో మెప్పించింది. ప్రస్తుతం ‘ఎఫ్‌3’లో హనీగా సందడి చేయనుంది.