Modern Love: 6 కథల సమాహారం.. ఆసక్తిగా ‘మోడర్న్‌ లవ్‌’ టీజర్‌

ఇంటర్నెట్‌ డెస్క్: ప్రముఖ నటులు సుహాసిని (Suhasini Maniratnam), రేవతి (Revathi), నిత్య మేనన్‌ (Nithya Menen), ఆది పినిశెట్టి (Aadhi Pinisetty), రీతూ వర్మ, మాళవిక నాయర్‌ తదితరులు ప్రధాన పాత్రల్లో తెరకెక్కిన వెబ్‌ సిరీస్‌ ‘మోడర్న్‌ లవ్‌: హైదరాబాద్‌’ (Modern Love: Hyderabad). ‘న్యూయార్క్‌ టైమ్స్‌’లో ప్రచురితమైన కథనాల స్ఫూర్తితో రూపొందిన ఈ సిరీస్‌ జులై 8 నుంచి ఓటీటీ అమెజాన్‌ ప్రైమ్‌లో స్ట్రీమింగ్‌ కానుంది. ఈ సందర్భంగా టీజర్‌ విడుదలైంది. ‘కొన్ని బంధాలు ఏళ్ల తరబడి నడుస్తాయ్‌. కొన్ని కొంతకాలానికే క్యాన్సిల్‌ అయిపోతాయ్‌’ అనే సంభాషణతో ప్రారంభమైన టీజర్‌ ఆసక్తిగా సాగింది. 6 కథల సమాహారంగా రూపొందిన ఈ సిరీస్‌లో ప్రేమలోని పలు పార్శ్వాలను చూపించనున్నారు. హైదరాబాద్‌ నేపథ్యంలో రూపొందిన ఈ ఆరు ఎపిసోడ్ల క్రేజీ సిరీస్‌కు వెంకటేశ్‌ మహా (కేరాఫ్‌ కంచరపాలెం సినిమా ఫేం), నగేశ్‌ కుకునూర్‌ (గుడ్‌లక్‌ సఖి చిత్ర ఫేం), ఉదయ్‌ గుర్రాల, దేవికా దర్శకత్వం వహించారు. ఇదే కథాంశంతో హిందీలో రూపొందిన ‘మోడర్న్‌ లవ్‌: ముంబయి’ ఇటీవల విడుదలై, మంచి ఆదరణ దక్కించుకుంది. తమిళనాడు నేటివిటీకి తగ్గట్టు రూపొందిన ‘మోడర్న్‌ లవ్‌: చెన్నై’ సిరీస్‌ త్వరలోనే రాబోతోంది.