Mohan Babu: చిరంజీవికి నాకూ మధ్య ఎలాంటి విభేదాల్లేవు: మోహన్‌బాబు

హైదరాబాద్‌: చిరంజీవి (Chiranjeevi)తో తనకు ఎలాంటి విభేదాల్లేవని స్పష్టం చేశారు నటుడు మోహన్‌బాబు (MohanBabu). వీలు కుదిరినప్పుడల్లా మేమిద్దరం మాట్లాడుకుంటూనే ఉంటామని అన్నారు. తాజాగా ఓ ఇంటర్వ్యూలో పాల్గొన్న మోహన్‌బాబుని చిరంజీవితో నెలకొన్న వివాదాలపై స్పందించమని విలేకరి కోరగా.. ఆయన ఆసక్తికర వ్యాఖ్యలు చేశారు. వజ్రోత్సవాల్లో జరిగిన వివాదంపై స్పందిస్తూ.. ‘‘సోషల్‌మీడియాలో ఇలాంటివి ఎన్నో వార్తలు వస్తుంటాయి. ఎప్పుడో జరిగిపోయిన దాని గురించి ఇప్పుడు ఎందుకు? ప్రస్తుతం  మేము సంతోషంగా ఉన్నాం. కొన్ని సందర్భాల్లో అన్నదమ్ములు, స్నేహితులు, ఆత్మీయుల మధ్య చిన్న చిన్న మాటలు వస్తుంటాయి. వాటిని పట్టించుకోవాల్సిన అవసరం లేదు. కాబట్టి ఆ విషయం గురించి వద్దు మరేదైనా అడగండి’’ బదులిచ్చారు.

‘‘మా’ (MAA Elections) ఎన్నికల సమయంలో మీ ఇద్దరి మధ్య ప్రతికూల వాతావరణం నెలకొన్నట్లు అందరూ అనుకున్నారు?’’ అని విలేకరి ప్రశ్నించగా.. ‘‘ఆ బాధ ఇప్పటికీ నా మనసులో ఉంది. అలా ఎందుకు జరిగింది? అది తన తప్పా? నా తప్పా? అనేది ఇప్పుడు చర్చించాలనుకోవడం లేదు. మేమిద్దరం వందసార్లు ఎదురుపడ్డాం. మాట్లాడుకున్నాం. మా మధ్య ఏమీ లేదు. బయటవాళ్లు అనుకోవడం మాత్రమే’’ అని ఆయన వివరించారు. ‘మా’ ఎన్నికల్లో విజయం సాధించిన విష్ణు (Vishnu).. అద్భుతంగా పనిచేసి చెప్పిన పనులన్నీ పూర్తి చేశాడని.. ఒక్క బిల్డింగ్‌ మాత్రమే పెండింగ్‌ ఉందని అన్నారు. విష్ణు నటించిన ‘జిన్నా’ ఫెయిల్యూర్‌పై స్పందిస్తూ.. ‘‘జిన్నా’ ఎందుకు విజయం సాధించలేకపోయిందనేది నాకు ఇప్పటికీ అర్థం కావడం లేదు. అది మంచి సినిమా. ఓటీటీలో మంచి ఫలితాలు అందుకుంది’’ అని ఆయన తెలిపారు.