Mohan Babu: సినిమానే కాదు విశాల్‌కు నిజంగానే ‘పొగరు’: మోహన్‌ బాబు

తిరుపతి: దాదాపు ఎనిమిదేళ్ల నుంచి తమ కుటుంబానికి సంబంధించిన సినిమాల వేడుకలకు తప్ప బయటి వాటికి వెళ్లడం లేదని, విశాల్‌ అడగ్గానే ‘లాఠీ’ ఫంక్షన్‌కు వచ్చానని ప్రముఖ నటుడు మోహన్‌ బాబు (Mohan Babu) అన్నారు. విశాల్‌ (Vishal) హీరోగా ఎ. వినోద్‌ కుమార్‌ తెరకెక్కించిన చిత్రం ‘లాఠీ’. ఈ నెల 22న ప్రేక్షకుల ముందుకు రానుంది. ఈ సందర్భంగా తిరుపతిలోని ఎస్వీ ఇంజినీరింగ్‌ కాలేజ్‌, ఎస్‌.డి.హెచ్‌.ఆర్‌ కళాశాలల్లో వేర్వేరుగా ప్రీ రిలీజ్‌ ఈవెంట్‌ నిర్వహించారు. ఎస్‌.డి.హెచ్‌.ఆర్‌ కాలేజ్‌లో జరిగిన వేడుకకు మోహన్‌ బాబు అతిథిగా హాజరయ్యారు.

ఈ వేడుకనుద్దేశించి మోహన్‌ బాబు మాట్లాడుతూ.. ‘‘తమిళనాడు నుంచి మన తెలుగు బిడ్డ విశాల్‌ ఇక్కడి వచ్చాడు. మనం ఆయన్ను ప్రేమించాలి, గౌరవించాలి. మా సినిమాలకు సంబంధించిన వేడుకలకు మినహా నేను 8 ఏళ్ల నుంచి బయటి వాటికి వెళ్లడంలేదు. విశాల్‌ చనువు తీసుకుని ‘అంకుల్‌.. తిరుపతిలో ఫంక్షన్‌ ఉంది. మీరు రావాలి’ అని కోరాడు. నేను వెంటనే ఓకే అని చెప్పా. ఆ కుటుంబంతో నాకున్న అనుబంధం అలాంటిది. విశాల్‌ తండ్రి నన్ను హీరోగా పెట్టి ‘యమ్‌ ధర్మరాజు: ఎంఏ’ అనే సినిమా తీశారు. ‘పందెం కోడి’లోని విశాల్‌ నటన నాకు బాగా నచ్చింది. ఆయన మంచి కథలను ఎంపిక చేసుకుంటాడు. ‘ప్రేమ చదరంగం’, ‘పొగరు’లాంటి ఎన్నో విజయవంతమైన చిత్రాలతో మెప్పించాడు. విశాల్‌కు నిజంగానే కొంచెం పొగరు ఉందనే సంగతి నాకు తెలుసు. మనిషికి పొగరుండాలి. కానీ, అది ఎదుటివారికి హాని చేసేలా ఉండకూడదు. ‘లాఠీ’ కానిస్టేబుల్‌ కథ. సమాజంలో ఏం జరిగినా ముందు తెలిసేది కానిస్టేబుల్‌కే. పోలీసు డిపార్ట్‌మెంట్‌ను నేను గౌరవిస్తా. ట్రైలర్‌ చూశా.. బాగుంది. ఈ సినిమా ‘పందెం కోడి’లా హిట్‌ అవుతుంది’’ అని మోహన్‌ బాబు ఆశాభావం వ్యక్తం చేశారు.

ఎస్వీ ఇంజినీరింగ్‌ కాలేజ్‌లో విశాల్‌..

‘‘లాఠీ’ సినిమాలో నాలుగో అంతస్తు నుంచి దూకే సన్నివేశం ఒకటుంది. దాన్ని రియలిస్టిక్‌గా చేయాలని అక్కడ్నుంచి దూకాను. గాయాలైతే కేరళలో చికిత్స తీసుకున్నా. మీ అందరినీ (అభిమానులు) ఇలా చూసుంటే ఎనిమిదో అంతస్తు నుంచే ధైర్యంగా దూకేవాణ్ని. 18సంవత్సరాల నుంచి నటుడిగా ప్రయాణం సాగిస్తున్నానంటే దానికి కారణం మీరే. నాకొక గుర్తింపు ఇచ్చారు. ఈ సినిమా పోలీసు కానిస్టేబుళ్లందరికీ అంకితమిస్తున్నాం. కాలేజీ రోజుల్లోనే నా లవ్‌ ఫెయిల్‌ అయింది. అప్పటి నుంచే నాకు పరాజయాలు అలవాటు. అవే ఎన్నో పాఠాలు నేర్పుతాయి’’ అని విశాల్‌ అన్నారు. అనంతరం అక్కడి విద్యార్థులతో కాసేపు ముచ్చటించారు. వారు అడిగిన పలు ప్రశ్నలకు సమాధానమిచ్చారు.

* మీరు పోషించిన వాటిల్లో మీకు బాగా నచ్చిన పాత్ర?

విశాల్‌: ‘పందెం కోడి’ సినిమాలోని క్యారెక్టర్‌.

* మీ తదుపరి ప్రాజెక్టుల గురించి చెబుతారా?

విశాల్‌: ప్రస్తుతం నటిస్తోన్న ‘మార్క్‌ ఆంటోనీ’ 2023 ఏప్రిల్‌ 14న విడుదలవుతుంది. స్వీయ దర్శకత్వంలో నేను నటిస్తున్న ‘డిటెక్టివ్ 2’ ఆగస్టులో విడుదలయ్యే అవకాశం ఉంది.

* మీ ఫిట్‌నెస్‌ రహస్యం?

విశాల్‌: నేను అన్నం, చపాతీ తినను. డైట్‌ ఫాలో అవుతా. నేను ఎక్కువగా సైకిల్‌పైనే ప్రయాణిస్తా. ఫిట్‌నెస్‌ నటులందరికీ ఎంతో అవసరం.

* ఒకవేళ మల్టీస్టారర్‌ సినిమా అవకాశం వస్తే ఏయే  భాషలో ఏ హీరోతో నటిస్తారు?

విశాల్‌: పవన్‌ కల్యాణ్‌ (తెలుగు), యశ్‌ (కన్నడ), అక్షయ్‌ కుమార్‌ (హిందీ). నేను పవన్‌ కల్యాణ్‌ అభిమానిని.

* చిత్ర పరిశ్రమలో అడుగుపెట్టకముందు, పెట్టాక సమస్యలు ఎదుర్కొన్నారా?

విశాల్‌: ఫిల్మ్‌ ఇండస్ట్రీలోకి వచ్చేందుకు ఇబ్బంది పడలేదు. కానీ, ఇక్కడికి వచ్చాక కొన్ని ఎదుర్కొన్నా. అయితే, జయపజయాలను నేను ఒకేలా స్వీకరిస్తా.