ఆ ఇద్దరు హీరోలే ట్రోల్స్‌ చేయిస్తున్నారు: మోహన్‌బాబు

హైదరాబాద్‌: సోషల్‌మీడియాలో వచ్చే ట్రోలింగ్స్‌పై నటుడు మోహన్‌బాబు షాకింగ్‌ కామెంట్స్‌ చేశారు. ఓ ఇద్దరు హీరోలే ఈ ట్రోలింగ్స్‌ చేయిస్తున్నారని ఆయన వ్యాఖ్యలు చేశారు. ప్రస్తుతం ‘సన్‌ ఆఫ్‌ ఇండియా’ ప్రమోషన్స్‌తో బిజీగా ఉన్న ఆయన తాజాగా ఓ ఛానెల్‌కు ఇంటర్వ్యూ ఇచ్చారు. ఇందులో పలు ఆసక్తికర అంశాలపై మాట్లాడారు. దర్శకుడు రత్నబాబు కథ చెప్పిన వెంటనే తనకు బాగా నచ్చేసిందని అన్నారు. ‘సన్‌ ఆఫ్‌ ఇండియా’ ఓ మంచి కథ అని.. సినిమా చూసిన ప్రేక్షకులకు తప్పకుండా నచ్చుతుందని తెలిపారు.

‘‘ఓసారి రత్నబాబు నన్ను కలిసి ‘సన్‌ ఆఫ్‌ ఇండియా’ కథ చెప్పారు. కుల వ్యవస్థ, రాజకీయం.. ఇలా చెప్పుకుంటూ వెళితే ఎన్నో కీలక అంశాలను ఈ సినిమాలో చూపించాం. ఒక రాజకీయ నాయకుడి కారణంగా ఓ అమాయకుడైన వ్యక్తి ఎలా ఇబ్బందులు ఎదుర్కొన్నాడు? అన్యాయంగా ఎలా జైలుకి వెళ్లాడు?.. ఇలాంటి ఎన్నో అంశాలపై ఈ చిత్రాన్ని తీర్చిదిద్దాం. భారతదేశంలో ఎంతోమంది చేయని తప్పులకు జైల్లో శిక్ష అనుభవిస్తున్నారు. అదే విషయాన్ని ఈ సినిమాలో చూపించాం. ప్రైవేటు జైలు అనే కొత్త కాన్సెప్ట్‌ని ఈ సినిమాలో చూపించాం’’ అని తెలిపారు.

అనంతరం సోషల్‌మీడియాలో వచ్చే ట్రోల్స్‌పై స్పందిస్తూ.. ‘‘సోషల్‌మీడియాలో వచ్చే ట్రోలింగ్స్‌ని తెలిసిన వాళ్లు అప్పుడప్పుడూ నాకు పంపిస్తుంటారు. ఒక్కొసారి వాటిని చూసినప్పుడు కాస్త బాధగా అనిపిస్తుంటుంది. ట్రోల్స్‌ అంటే.. నవ్వించేలా ఉండాలి కానీ, అసభ్యకరంగా ఉండకూడదు. ఓ ఇద్దరు హీరోలు.. కొంతమందిని అపాయింట్‌ చేసుకుని ఇలాంటి ట్రోల్స్‌ క్రియేట్‌ చేయిస్తున్నారు. ఆ హీరోలు ఎవరో నాకు బాగా తెలుసు. ట్రోల్స్‌ చేయించేవాళ్లు తాత్కాలికంగా ఆనందం పొందవచ్చు. కానీ, ఏదో ఒక సమయంలో వాళ్లు కూడా ఇబ్బందులు ఎదుర్కోక తప్పదు’’ అని మోహన్‌బాబు వ్యాఖ్యలు చేశారు.