కీరవాణి జీవితంలో ‘R’ అనుబంధం ప్రత్యేకం

ఇంటర్నెట్‌డెస్క్‌: పాన్‌ ఇండియా స్థాయిలో తెరకెక్కుతున్న ‘ఆర్‌ఆర్‌ఆర్‌’ చిత్రానికి సంగీతం అందిస్తున్నారు ఎమ్‌. ఎమ్‌. కీరవాణి.  ఆయన జీవితంలో  ‘ఆర్‌’ అనే అక్షరంతో  ప్రత్యేక అనుబంధం ఉంది.  ‘మనసు మమత’తో తొలిసారి సంగీత దర్శకుడయ్యారు.  కీరవాణి సంగీతం అందించిన తొలి సినిమాను నిర్మించింది రామోజీరావు. ఆ తర్వాత  ఉషాకిరణ్‌ మూవీస్‌ బ్యానర్‌లో వరుస అవకాశాలు అందుకున్నారు. ‘పీపుల్స్ ఎన్‌కౌంటర్’‌, ‘అశ్విని’, ‘అమ్మ’  ఆఫర్లు అందించి టాలీవుడ్‌లో గట్టి పునాది పడేందుకు తోడ్పడ్డారు. ఆ తర్వాత ‘ఆర్’‌.. రామ్‌గోపాల్‌ వర్మ. ‘శివ’తో ఇండస్ట్రీ హిట్‌ కొట్టి విపరీతమైన క్రేజ్‌ సంపాదించుకున్నాడాయన. అలాంటి సమయంలో తన రెండో చిత్రం ‘క్షణక్షణం’ సినిమాకు కీరవాణిని ఎంచుకోవడంతో ఇండస్ట్రీలో ఆయన పేరు మార్మోగిపోయింది. టాలీవుడ్‌ అంతా కీరవాణి గురించి మాట్లాడుకున్నారు.  దీంతో పెద్ద సినిమాల ఆఫర్లు వరుస కట్టాయి . ఇక ఇంకో ‘ఆర్‌’  ఆయన సోదరుడు రాజమౌళి. ‘బాహుబలి’ సినిమాతో  కీరవాణి ప్రతిభను, పేరును విశ్వవ్యాప్తం చేశాడాయన. ఈ ముగ్గురే కాదు.. మరో వ్యక్తి కూడా కీరవాణి కెరీర్‌లో కీలకంగా వ్యవహరించారు. ఆయనే దర్శకేంద్రుడు కె. రాఘవేంద్ర రావు. అత్యధికంగా 27 చిత్రాలకు దర్శకేంద్రుడితో పనిచేశారు. వాటిలో ఎక్కువశాతం హిట్లే. వీరందరి పేర్లు ‘ఆర్‌’ తోనే మొదలవడం, ఇప్పుడు ‘ఆర్‌ఆర్‌ఆర్‌’కు సంగీతమందిస్తుండటంతో ప్రాధాన్యత సంతరించుకుంది.  అలా కీరవాణికి ‘ఆర్‌’ అక్షరంతో  విడదీయరాని అనుబంధం ఏర్పడింది.