Nagababu: ఎన్నో ఒడుదొడుకులు ఎదుర్కొన్నా: నాగబాబు

నటుడి పోస్ట్‌ వైరల్‌..

హైదరాబాద్‌: తన జీవితంలో ఇప్పటివరకూ ఎన్నో ఒడుదొడుకులు ఎదుర్కొన్నానని నటుడు నాగబాబు అన్నారు. ఓవైపు పలు చిత్రాల్లో సహాయ నటుడిగా నటిస్తూనే, మరోవైపు బుల్లితెర కార్యక్రమాలతోనూ ఆయన అలరిస్తున్నారు. ఏ కాస్త సమయం దొరికినా సోషల్‌మీడియా వేదికగా అభిమానులతో మమేకమయ్యే ఆయన.. తాజాగా పెట్టిన ఓ పోస్ట్‌ వైరల్‌గా మారింది. ‘‘ఈ బాటసారి ప్రయాణం కొనసాగుతుంది..’’ అంటూ శనివారం సాయంత్రం తన సోషల్‌మీడియా ఖాతాల్లో ఓ పోస్ట్ పెట్టారు.

‘‘ఇన్నేళ్ల నా జీవితంలో ఎన్నో ఒడుదొడుకులు, మరెన్నో విపత్తులను ఎదుర్కొని నన్ను నేనుగా మార్చుకోగలిగాను. ఒక రకంగా చూస్తే ఈ ఆపదలు, కష్టాలే నన్ను ఒక పూర్తి మనిషిగా మలచడానికి ఎంతగానో సహాయపడ్డాయి..! నేను పుట్టి పెరిగిన నా దేశానికి, తోటిప్రజలకు సహాయపడాలని నిర్ణయించుకొని అదే గమ్యంగా లక్ష్యం వైపు పయనించాను. ఈ పయనంలో ఒడుదొడుకులు, ఆటంకాలు ఎదురైనా.. నన్ను ప్రతిసారీ వెన్నంటి నడిపించి నాకు మనిషిగా ఎదిగే అవకాశాన్ని ఇచ్చింది కూడా ఈ కష్టాలే..! అందుకే, ఇప్పటి నుంచి నా పూర్తి సమయాన్ని గమ్యం దిశగా ప్రయాణం కొనసాగించటానికి ఉపయోగించాలని నిర్ణయించుకొన్నా. మరిన్ని వివరాలతో త్వరలో మీ ముందుకొస్తా. ఈ బాటసారి ప్రయాణం కొనసాగుతుంది’’ అని నాగబాబు రాసుకొచ్చారు. ఇది కాస్త నెట్టింట్లో వైరల్‌గా మారింది. అయితే ఈ పోస్ట్‌ చూసిన నెటిజన్లు ‘‘మీరు ఏం చెప్పాలనుకుంటున్నారు?’’ అంటూ కామెంట్లు చేస్తున్నారు.