Naga Chaitanya: నువ్వే నాకు ప్రేమించడం నేర్పించావ్‌.. చై ఎమోషనల్‌ పోస్ట్‌

హైదరాబాద్‌: కథానాయిక సమంత(Samantha) పెంపుడు శునకం హాష్‌(HASH) ఎలా ప్రేమించాలో తనకు నేర్పిందని నటుడు నాగచైతన్య (Naga Chaitanya) అన్నారు. ఆయన హీరోగా నటించిన ‘థ్యాంక్యూ’ (Thank You) ప్రేక్షకుల ముందుకు రానున్న సందర్భంగా తన జీవితంలో కీలకపాత్ర పోషించిన వారికి ఆయన కృతజ్ఞతలు చెప్పారు. ‘‘థ్యాంక్యూ.. అవసరమైన సందర్భంలో నేను ఎక్కువగా వాడే పదం ఇది. నా తదుపరి చిత్రం ‘థ్యాంక్యూ ది మూవీ’ రిలీజ్‌ కానున్న సందర్భంగా ఓ అద్భుతమైన ఆలోచన వచ్చింది. నన్ను అమితంగా ప్రేమించి, నా జీవితంలో కీలకపాత్ర పోషించిన వారికే ఈ పోస్ట్‌ని అంకితం చేస్తున్నా. వారి ప్రేమకు కృతజ్ఞతలు చెబితే సరిపోదు. అమ్మ.. నా వెన్నంటే ఉంటూ, ఎప్పటికప్పుడు నన్ను నిర్మిస్తూ, అన్నివిధాలుగా నన్ను ప్రేమిస్తున్నందుకు థ్యాంక్యూ. నాన్న.. ప్రతి విషయంలో నాకంటూ ఓ దారి చూపించి, ఓ స్నేహితుడిలా ఉన్నందుకు కృతజ్ఞతలు. అలాగే, హాష్‌.. ప్రేమించడం ఎలాగో తెలిసేలా చేసి, నన్ను ఒక మనిషిగా ఉంచినందుకు థ్యాంక్యూ’’ అని చైతన్య పోస్ట్ పెట్టారు.

అంతేకాకుండా తమ జీవితాల్లో కీలక పాత్ర పోషించిన వారికి కృతజ్ఞతలు చెబుతూ themagicwordisthankyou పేరుతో పోస్టులు పెట్టమని ఆయన అభిమానులకు పిలుపునిచ్చారు. ‘థ్యాంక్యూ’ చిత్రానికి విక్రమ్‌ కె.కుమార్‌ దర్శకత్వం వహించారు. రాశీఖన్నా, మాళవికా నాయర్‌, అవికాగోర్‌ కథానాయికలు. జులై 22 ఈ సినిమా ప్రేక్షకుల ముందుకు రానుంది. ఇక 2017లో వివాహమైన తర్వాత నుంచి సామ్‌, చై.. హాష్‌ని పెంచుకొంటున్నారు. హాష్‌ ఫొటోలను గతంలో సామ్‌ తరచూ సోషల్‌మీడియాలో షేర్‌ చేసేది. గతేడాది చైతన్య-సామ్‌ విడిపోయిన నాటి నుంచి హాష్‌ ఆమె వద్దే ఉంది. ఈ క్రమంలోనే తాజాగా చైతన్య పెట్టిన పోస్ట్‌ అందరి దృష్టిని ఆకర్షిస్తోంది.