balakrishna: సినీ నటుడు నందమూరి బాలకృష్ణకు కరోనా పాజిటివ్‌

హైదరాబాద్‌: సినీ నటుడు, హిందూపూర్‌ శాసనసభ్యుడు నందమూరి బాలకృష్ణ(Bala krishna) కరోనా బారినపడ్డారు. తాజాగా చేసిన కరోనా పరీక్షల్లో ఆయనకు పాజిటివ్‌ నిర్ధారణ కావటంతో హోం ఐసోలేషన్‌కు వెళ్లారు. తాను పూర్తిగా ఆరోగ్యంతో ఉన్నానని బాలకృష్ణ తెలిపారు. గత రెండు రోజులుగా తనని కలిసిన వారు కూడా కరోనా టెస్టు చేయించుకోవాలని సూచించారు. బాలకృష్ణ త్వరగా కోలుకోవాలని ఆయన అభిమానులు, శ్రేయోభిలాషులు సామాజిక మాధ్యమాల వేదికగా సందేశాలు పంచుకుంటున్నారు.

ఇక సినిమాల విషయానికొస్తే, ‘అఖండ’ విజయంతో బాలకృష్ణ జోరుమీదున్నారు. ప్రస్తుతం గోపీచంద్‌ మలినేని దర్శకత్వంలో ఓ పవర్‌ఫుల్‌ యాక్షన్‌ మూవీలో నటిస్తున్నారు. శ్రుతిహాసన్‌ కథానాయిక. దీని తర్వాత అనిల్‌ రావిపూడి దర్శకత్వంలో ఓ విభిన్న కథతో ప్రేక్షకుల ముందుకు రానున్నారు. దీంతో పాటు వ్యాఖ్యాతగానూ బాలకృష్ణ మరోసారి అలరించనున్నారు. ‘అన్‌స్టాపబుల్‌ సీజన్‌-2’తో అలరించేందుకు సిద్ధమవుతున్నారు.