Naresh: ‘మళ్ళీ పెళ్లి’.. వీడియో షేర్‌ చేసిన నరేశ్‌

హైదరాబాద్‌: తన పెళ్లిపై ఇటీవల కాలంలో జరిగిన ప్రచారాలన్నింటికీ పుల్‌స్టాప్‌ పెడుతూ నటుడు నరేశ్‌ (Naresh) తాజాగా ఓ వీడియో షేర్‌ చేశారు. పవిత్రా లోకేశ్‌ (Pavitra Lokesh)తో కలిసి తాను ఓ సినిమాలో నటిస్తున్నట్లు వెల్లడించారు. ఎం.ఎస్‌. రాజు దర్శకత్వంలో తెరకెక్కుతోన్న ఈ చిత్రానికి ‘మళ్ళీ పెళ్లి’ అనే టైటిల్‌ను ఫిక్స్ చేశారు. తెలుగు, కన్నడ భాషల్లో ఇది విడుదల కానుంది. విజయకృష్ణ మూవీస్‌ పతాకంపై తెరకెక్కుతోన్న ఈ చిత్రాన్ని వేసవి కానుగా విడుదల చేయనున్నారు. ఈ మేరకు ‘మళ్ళీ పెళ్లి’ ఫస్ట్‌లుక్‌ పోస్టర్‌తోపాటు స్పెషల్‌ వీడియోను శుక్రవారం ఆయన ట్విటర్‌ వేదికగా సినీ ప్రియులతో పంచుకున్నారు. ప్రస్తుతం ఇది నెటిజన్ల దృష్టిని ఆకర్షిస్తోంది.

నరేశ్‌ - పవిత్రల గురించి గత కొంతకాలంగా వార్తలు వస్తోన్న విషయం తెలిసిందే. వీరిద్దరూ రిలేషన్‌లో ఉన్నారని, పెళ్లి చేసుకుంటున్నారని నెటిజన్లు మాట్లాడుకున్నారు. కొత్త ఏడాదికి శుభాకాంక్షలు చెబుతూ నరేశ్‌ షేర్‌ చేసిన ఓ వీడియోతోపాటు పెళ్లి వీడియో ఈ చర్చకు మరింత బలాన్ని చేకూర్చాయి. ఆయా వీడియోలు చూసిన పలువురు నెటిజన్లు ఇది నిజమేనా? లేదా సినిమా ప్రచారమా? అని సందేహాలు వ్యక్తం చేశారు. ఇటీవల ఓ మీడియా సమావేశంలో పాల్గొన్న నరేశ్‌.. పెళ్లి వార్తలపై స్పందిస్తూ త్వరలోనే అన్ని విషయాలు వెల్లడిస్తానన్నారు. ఈ నేపథ్యంలో తాజాగా ఆయన ‘మళ్ళీ పెళ్లి’ పోస్టర్‌ షేర్‌ చేయడంతో ఇప్పటివరకూ జరిగిందంతా సినిమా ప్రమోషనే అయి ఉండొచ్చని పలువురు అభిప్రాయం వ్యక్తం చేస్తున్నారు.