Balakrishna: భారీ పోరాటంలో బాలకృష్ణ

బాలకృష్ణ (Balakrishna) కథానాయకుడిగా అనిల్‌ రావిపూడి (Anil Ravipudi) దర్శకత్వంలో ఓ చిత్రం రూపొందుతోంది. సాహు గారపాటి, హరీష్‌ పెద్ది సంయుక్తంగా నిర్మిస్తున్నారు. కాజల్‌ కథానాయిక. శ్రీలీల కీలక పాత్ర పోషిస్తోంది. ఈ సినిమా చిత్రీకరణ హైదరాబాద్‌లో శరవేగంగా జరుగుతోంది. ఇందులో భాగంగా ఇప్పుడు బాలయ్యపై ఓ భారీ పోరాట ఘట్టాన్ని తెరకెక్కిస్తున్నట్లు సమాచారం. దీనికి వెంకట్‌ మాస్టర్‌ నేతృత్వం వహిస్తున్నారు. సినిమాకి ఎంతో కీలకమైన యాక్షన్‌ ఎపిసోడ్‌ ఇదని, దాదాపు రెండు వారాల పాటు చిత్రీకరణ కొనసాగనున్నట్లు సమాచారం. బాలకృష్ణ ఇమేజ్‌కు తగ్గట్లుగా సాగే ఓ శక్తిమంతమైన మాస్‌ యాక్షన్‌ కథాంశంతో అనిల్‌ ఈ చిత్రాన్ని ముస్తాబు చేస్తున్నారు. ఇది దసరా సందర్భంగా ప్రేక్షకుల ముందుకు రానుంది. ఈ చిత్రానికి తమన్‌ స్వరాలందిస్తుండగా.. సి.రామ్‌ప్రసాద్‌ ఛాయాగ్రాహకుడిగా వ్యవహరిస్తున్నారు.