నా మతి చెడగొట్టావే...!

సంపూర్ణేష్‌బాబు, మహేశ్వరి వద్ది జంటగా నటిస్తున్న చిత్రం ‘బజార్‌ రౌడీ’. వసంత నాగేశ్వరరావు దర్శకుడు. సందిరెడ్డి శ్రీనివాసరావు నిర్మిస్తున్నారు. సాయి కార్తిక్‌ స్వరాలందిస్తున్నారు. ఈ చిత్రంలోని రెండో గీతాన్ని సోమవారం విడుదల చేశారు. ‘‘పిల్లా నా మతి చెడగొట్టావే’’ అంటూ హుషారుగా సాగుతున్న ఈ డ్యూయెట్‌కి గణేష్‌ సాహిత్యమందించగా.. దత్తు, పల్లవి ఆలపించారు. ‘‘ఈ సినిమాలో సంపూర్ణేష్‌ పక్కా మాస్‌ క్యారెక్టర్‌తో ప్రేక్షకుల్ని అలరిస్తారు. ఆయన శైలికి తగ్గట్లుగా సాగే విభిన్నమైన వినోదాత్మక కథతో ఈ చిత్రం తెరకెక్కించాం. కరోనా తీవ్రత తగ్గిన వెంటనే సినిమాని ప్రేక్షకుల ముందుకు తీసుకొస్తామ’’ని చిత్ర బృందం తెలియజేసింది. ఈ చిత్రానికి కూర్పు: గౌతం రాజు, ఛాయాగ్రహణం: ఏ విజయ్‌ కుమార్‌.