Naga Vamsi: స్టార్‌ హీరో సినిమా.. నిర్మాత నాగవంశీ కీలక నిర్ణయం

హైదరాబాద్‌: చదువు గొప్పతనాన్ని తెలియజేసేలా తెరకెక్కిన చిత్రం ‘సార్‌’ (SIR). కోలీవుడ్‌ స్టార్‌ హీరో ధనుష్‌ (Dhanush) కథానాయకుడిగా వెంకీ అట్లూరి (Venky Atluri) ఈ చిత్రాన్ని తెరకెక్కించారు. సితార ఎంటర్‌టైన్‌మెంట్స్‌ పతాకంపై ఇది రూపుదిద్దుకుంది. ప్రస్తుతం థియేటర్లలో రన్‌ అవుతోన్న ఈ సినిమా విషయంలో నిర్మాత నాగవంశీ (Naga Vamsi) ఓ కీలక నిర్ణయాన్ని తీసుకున్నారు. పాఠశాలల్లో చదువుతోన్న చిన్నారుల కోసం దీన్ని ఉచితంగా ప్రదర్శించాలనుకున్నారు.

‘‘విద్య వల్ల వచ్చే గౌరవాన్ని, దాని విలువపై అందరికీ అవగాహన కల్పించాలనే ఉద్దేశంతో ‘సార్‌’ చిత్రాన్ని తెరకెక్కించాం. ఈ నేపథ్యంలోనే స్కూల్స్‌లో చదువుతోన్న పిల్లలకు మా ఈ చిత్రాన్ని ఉచితంగా చూపించనున్నందుకు ఆనందిస్తున్నాను. మీ స్కూల్‌కు సంబంధించిన వివరాలను మా సంస్థకు మెయిల్‌ చేయగలరు. షో వివరాలను మా టీమ్‌ మీకు త్వరలో తెలియజేస్తుంది’’ అని వంశీ పేర్కొన్నారు. ఈ ట్వీట్‌ చూసిన నెటిజన్లు నిర్మాత నిర్ణయంపై హర్షం వ్యక్తం చేస్తున్నారు. మరోవైపు తాజాగా ఈ చిత్రాన్ని నందమూరి బాలకృష్ణ వీక్షించారు. సినిమా బాగుందంటూ చిత్రబృందాన్ని మెచ్చుకున్నారు.  ‘సార్‌’ బాక్సాఫీస్‌ వద్ద బాగానే సందడి చేస్తోంది. తాజాగా తెలుగు, తమిళ భాషల్లో కలిపి ప్రపంచవ్యాప్తంగా ఈ సినిమా రూ.100కోట్ల (గ్రాస్‌) మార్కును దాటింది. ఈ విషయాన్ని తెలియజేస్తూ చిత్ర బృందం పోస్టర్‌ను విడుదల చేసింది. అంతేకాదు, సినిమాను ఆదరిస్తున్న ప్రేక్షకులకు ధన్యవాదాలు తెలిపింది.