Tollywood: నవమి.. నవోత్సాహం

పండగొస్తుందంటే చాలు చిత్రసీమలో ప్రచార పర్వం పదునెక్కుతుంటుంది. విడుదలకు సిద్ధమవుతున్న చిత్రాలతో పాటు సెట్స్‌పై ముస్తాబవుతున్న సినిమాలూ కొత్త ప్రచార చిత్రాలతో సినీప్రియుల్ని ఆకర్షించే ప్రయత్నం చేస్తుంటాయి. ఈ ఆనవాయితీ శ్రీరామనవమి వేళా కొనసాగింది. ‘‘మంత్రం కంటే గొప్పది నీ నామం’’ అంటూ ‘ఆదిపురుష్‌’ కొత్త పోస్టర్‌తో అభిమానుల ముందుకొచ్చారు ప్రభాస్‌. ఆయన రాముడిగా నటించిన ఈ సినిమాని ఓం రౌత్‌ తెరకెక్కించిన సంగతి తెలిసిందే. రామాయణం ఆధారంగా రూపొందిన ఈ చిత్రంలో సీతగా కృతిసనన్‌ నటించగా.. రావణుడి పాత్రను సైఫ్‌ అలీ ఖాన్‌ పోషించారు. మోషన్‌ కాప్చర్‌ విధానంలో తెరకెక్కిన ఈ సినిమా జూన్‌ 16న ప్రేక్షకుల ముందుకు రానుంది. ఈ వేసవి బరిలో వినోదాలు పంచేందుకు ‘రామబాణం’లా దూసుకొస్తున్నారు గోపీచంద్‌. శ్రీరామనవమి సందర్భంగా గురువారం ఈ చిత్రం నుంచి ఒక వీడియో గ్లింప్స్‌ను విడుదల చేశారు. అందులో రామ-లక్ష్మణుల్లా జగపతిబాబు, గోపీచంద్‌ కలిసి నడిచొస్తూ కనిపించారు. ‘‘ఆ రాముడికి లక్ష్మణుడు, హనుమంతుడని ఇద్దరుంటారు. ఈ రాముడికి ఆ ఇద్దరూ నేనే’’ అంటూ ఆ వీడియోలో గోపీచంద్‌ పేల్చిన డైలాగ్‌ హైలైట్‌గా నిలిచింది. శ్రీవాస్‌ తెరకెక్కించిన ఈ సినిమా మే 5న థియేటర్లలోకి రానుంది. శ్రీరామనవమి వేళ జంటగా కనిపించి కనువిందు చేశారు రవితేజ, అను ఇమ్మాన్యుయేల్‌. ఇప్పుడీ ఇద్దరూ కలిసి నటించిన చిత్రం ‘రావణాసుర’. సుధీర్‌ వర్మ తెరకెక్కించిన ఈ స్టైలిష్‌ యాక్షన్‌ థ్రిల్లర్‌ ఏప్రిల్‌ 7న విడుదల కానుంది. ఈ నేపథ్యంలోనే గురువారం ఈ చిత్రం నుంచి కొత్త లుక్‌ విడుదల చేసి ప్రేక్షకులకు పండగ శుభాకాంక్షలు తెలిపింది చిత్ర బృందం. ‘సామజవరగమన’ చిత్ర బృందం కూడా నవమి సందర్భంగా కొత్త పోస్టర్‌తో సినీప్రియులకు శుభాకాంక్షలు తెలిపింది. శ్రీవిష్ణు హీరోగా రామ్‌ అబ్బరాజు తెరకెక్కించిన ఈ సినిమా మే 18న బాక్సాఫీసు ముందుకు రానుంది.