Cinema News: ఆ స్ఫూర్తితో ‘బనారస్‌’

జైద్‌ ఖాన్‌, సోనాల్‌ మోన్‌టైరో జంటగా జయతీర్థ తెరకెక్కించిన చిత్రం ‘బనారస్‌’ (Banaras). తిలక్‌ బల్లాల్‌ నిర్మించారు. అజనీష్‌ లోక్‌నాథ్‌ స్వరాలందించారు. ఈ సినిమా త్వరలో తెలుగు, హిందీ, తమిళ, కన్నడ, మలయాళ భాషల్లో ప్రేక్షకుల ముందుకు రానుంది. ఈ చిత్రంలోని ‘‘మాయ గంగ’ పాటను దర్శకుడు సుకుమార్‌(Sukumar) హైదరాబాద్‌లో విడుదల చేశారు. ఈ సందర్భంగా ఆయన మాట్లాడుతూ.. ‘‘పాట చాలా బాగుంది. కె.కె. చక్కటి సాహిత్యమందించారు. జైద్‌ తండ్రి పెద్ద రాజకీయ నాయకుడు. ఆసక్తితో జైద్‌ సినిమాల్లోకి వచ్చాడు. పాన్‌ ఇండియా స్థాయిలో విడుదలవుతున్న ఈ సినిమా విజయవంతం కావాలని కోరుకుంటున్నా’’ అన్నారు. ‘‘త్వరలో రానున్న మా సినిమానీ అలాగే ఆదరించాలని కోరుకుంటున్నా’’ అన్నారు చిత్ర దర్శకుడు. హీరో జైద్‌ ఖాన్‌ మాట్లాడుతూ.. ‘‘హీరోగా నేను వేస్తున్న తొలి అడుగు ఇది. ఆశీర్వదించాలని కోరుకుంటున్నా’’ అన్నారు. ‘‘పుష్ప’ సినిమా ఇచ్చిన స్ఫూర్తితో మా చిత్రాన్ని పాన్‌ ఇండియా స్థాయిలో విడుదల చేస్తున్నాం’’ అన్నారు నిర్మాత. కె.కె, సోనాల్‌ పాల్గొన్నారు.