Niharika: ‘పుష్ప’ టు ‘ఆర్‌ఆర్‌ఆర్‌’.. సిగ్నేచర్‌ స్టెప్పులతో అదరగొట్టేసిన నిహారిక

హైదరాబాద్‌: వివాహం తర్వాత సినిమాలకు దూరమైన నటి నిహారిక.. నిర్మాతగా పలు వెబ్‌ సిరీస్‌లు నిర్మిస్తూ ప్రేక్షకులకు ఎంటర్‌టైన్‌మెంట్‌ అందిస్తున్నారు. ప్రస్తుతం ఆమె వర్క్‌ లైఫ్‌తోపాటు భర్త, కుటుంబం, స్నేహితులతో సమయాన్ని గడుపుతూ జీవితాన్ని ఆస్వాదిస్తున్నారు.

తాజాగా ఈ భామ తన డ్యాన్స్‌తో నెటిజన్లను ఫిదా చేశారు. తన స్నేహితురాలు, కొరియోగ్రాఫర్‌ మృణాలి కిరణ్‌తో కలిసి ఇటీవల విడుదలైన చిత్రాల్లోని ఫేమస్‌ పాటలకు సిగ్నేచర్‌ స్టెప్పులు రీ క్రియేట్‌ చేశారు. ‘పుష్ప’ నుంచి ‘సామీ’, ‘ఆర్‌ఆర్‌ఆర్‌’ నుంచి ‘నాటు నాటు’, ‘ది వారియర్‌’ నుంచి ‘కమాన్‌ బేబీ‌’ వంటి పాటలకు వీరిద్దరూ డ్యాన్స్‌ చేసి అలరించారు. ఇన్‌స్టాలో ఈ వీడియో షేర్‌ చేసిన నిహారిక.. ‘‘టాలెంటెడ్‌ మృణాలితో ఇలా మొదటిసారి డ్యాన్స్‌ చేస్తున్నా. ఈ వీడియో షూట్‌ ఫుల్‌ ఫన్నీగా ఉంది’’ అని రాసుకొచ్చింది. మరో వీడియోలో తన తండ్రి నాగబాబుకు నిహారిక ట్రీట్‌మెంట్‌ చేస్తున్నట్లు కనిపించారు. గాయం కావడంతో నాగబాబు తన చేతికి బ్యాండ్‌ వేసుకోగా.. ఆ చేతి నొప్పిని తగ్గిస్తానంటూ నిహారిక సరదాగా ట్రీట్‌మెంట్‌ చేశారు. ఈ సరదా వీడియోని నాగబాబు షేర్‌ చేస్తూ.. ‘‘ముల్లును ముల్లుతోనే తీయాలి అంటే ఇదేనేమో.. మీరు దీన్ని ప్రయత్నించకండి. నిపుణురాలైన నిహారిక పర్యవేక్షణలో ఇది జరిగింది’’ అని పేర్కొన్నారు.