Sandeep Reddy: ‘అప్పుడు చిరంజీవికి ఏం కాలేదు కదా’ అని బదులిచ్చేవాణ్ని: సందీప్‌రెడ్డి

హైదరాబాద్‌: గాయని స్మిత (Smita) వ్యాఖ్యాతగా వ్యవహరిస్తోన్న ‘నిజం’ (Nijam) కార్యక్రమంలో దర్శకులు దేవ కట్టా (Dev Katta), సందీప్‌ రెడ్డి వంగా (Sandeep Reddy Vanga) సందడి చేశారు. తమ కెరీర్‌ ఎలా మొదలైంది? ఎదుర్కొన్న అవమానాలు? ఇలాంటి ఎన్నో విషయాలపై వీరిద్దరూ మాట్లాడారు. శుక్రవారం ప్రసారం కానున్న ఈ ఎపిసోడ్‌ ప్రోమో తాజాగా విడుదలైంది.

దేవ కట్టా (Dev Katta) మాట్లాడుతూ.. ‘‘నేను చెన్నైలో పుట్టి పెరిగాను. మణిరత్నం, భారతీరాజా, బాలచందర్‌ తెరకెక్కించిన సినిమాలతోపాటు ‘శివ’ చూసి ఎంతో స్ఫూర్తి పొందాను. అలా సినిమాల వైపు అడుగులు వేశాను’’ అని తెలిపారు. అంతేకాకుండా ‘‘సినిమాల వల్ల సమాజం చెడిపోతోంది. సమాజాన్ని బాగు చేయాల్సిన బాధ్యత సినిమాకు ఉంది’’ అనేది ‘ఓవర్‌ రేటెడ్‌’ చర్చ అని అభిప్రాయపడ్డారు.

అనంతరం సందీప్‌ (Sandeep Reddy Vanga) మాట్లాడుతూ.. ‘‘చిన్నప్పుడు బంధువుల ఇళ్లకు వెళ్లినప్పుడు నేను చేసే పనులు చూసి.. మా అమ్మకు చెబుతామంటూ  బెదిరించేవాళ్లు. అలాంటప్పుడు ‘ఘరానా మొగుడు’ సినిమా క్లైమాక్స్‌లో చిరంజీవి కూడా మంటల్లోకి దూకారు. అప్పుడు ఆయనకు ఏం కాలేదు కదా’ అని వాళ్లకు సమాధానం ఇచ్చేవాణ్ని’’ అని అన్నారు. అలాగే తాను మొదట్లో కెమెరామెన్‌ కావాలనుకున్నానని సందీప్‌ తన మనసులోని మాటను బయటపెట్టారు.