Nithiin: నితిన్‌ ఆ స్టైలిష్‌ దర్శకుడితో సినిమా చేయనున్నారా?

హైదరాబాద్‌: జయాపజయాలతో సంబంధం లేకుండా వరుస సినిమాలతో అలరిస్తున్న యువ కథానాయకుడు నితిన్‌. ఆయన కీలక పాత్రలో నటించిన ‘మ్యాస్ట్రో’ త్వరలోనే డిస్నీ+హాట్‌ స్టార్‌లో స్ట్రీమింగ్‌ కానుంది. మరోవైపు నితిన్‌ తర్వాతి ప్రాజెక్టుల విషయంలో స్పష్టత రావటం లేదు. వక్కంతం వంశీతో ఓ సినిమా చేస్తారని టాక్ వినిపించింది. మరోవైపు ‘పవర్‌పేట’పేరుతో ఓ సినిమా చేయనున్నట్లు ప్రకటించారు. అయితే, కరోనా పరిస్థితుల నేపథ్యంలో ఇవి ఎప్పుడు మొదలవుతాయో తెలియడం లేదు. తాజాగా మరో వార్త టాలీవుడ్‌లో చక్కర్లు కొడుతోంది. స్టైలిష్‌ డైరెక్టర్‌గా పేరు తెచ్చుకున్న సురేందర్‌రెడ్డి దర్శకత్వంలో నితిన్‌ ఓ సినిమా చేయనున్నట్లు టాక్‌. ప్రస్తుతం సురేందర్‌రెడ్డి అఖిల్‌తో ‘ఏజెంట్‌’ చేస్తున్నారు. దీని తర్వాత నితిన్‌తో చిన్న సినిమా చేస్తారని సమాచారం. దీనికి వక్కంతం వంశీ స్క్రిప్ట్‌ అందించనున్నట్లు తెలుస్తోంది. కేవలం మూడు నెలల్లోనే ఈ సినిమా షూట్‌ పూర్తి చేయాలని శ్రేష్ఠ మూవీస్‌ లక్ష్యంగా పెట్టుకుందట. దీనిపై త్వరలోనే స్పష్టత వచ్చే అవకాశం ఉంది.