Nivetha: ఫ్రైడ్‌రైస్‌లో బొద్దింక.. నటి ఫైర్‌

హీరోయిన్‌కి చేదు అనుభవం

హైదరాబాద్‌: నటి నివేదా పేతురాజ్‌కు చేదు అనుభవం ఎదురయ్యింది. ఆన్‌లైన్‌లో ఫుడ్‌ ఆర్డర్ చేస్తే.. అందులో బొద్దింక వచ్చింది. దీంతో ఈ నటి సదరు రెస్టారెంట్‌, ఫుడ్‌ డెలీవరి సంస్థపై ఆగ్రహం వ్యక్తం చేశారు. చెన్నైలో పేరుపొందిన ఓ ప్రముఖ రెస్టారెంట్‌ నుంచి బుధవారం సాయంత్రం నివేదా పేతురాజ్‌  ఫ్రైడ్‌ రైస్‌ను ఆర్డర్‌ చేశారు. ఫుడ్‌ డెలీవరి అయిన అనంతరం ప్యాక్‌ ఓపెన్‌ చేయగానే అందులో ఆమెకు బొద్దింక కనిపించింది. దీంతో ఆమె.. రెస్టారెంట్‌ని ట్యాగ్‌ చేస్తూ ఇన్‌స్టాలో ఓ పోస్ట్‌ పెట్టారు. ‘ఇటీవల కాలంలో హోటళ్లు సరిగ్గా పరిశుభ్రతను పాటించడం లేదు అనడానికి ఇదొక ఉదాహరణ. నేను ఆర్డర్ చేసిన భోజనంలో బొద్దింక వచ్చింది. ఈ హోటల్‌ వాళ్లు సరిగ్గా నాణ్యత ప్రమాణాలు పాటించడం లేదు. కొనుగోలుదారుల ఆరోగ్యంతో ఆడుకుంటున్న ఇలాంటి హోటళ్లపై భారీ జరిమానా విధించాలి’ అని ఆమె అన్నారు.

‘ఓరు నాల్‌ కొథు’ అనే తమిళ సినిమాతో నివేదా ఇండస్ట్రీలోకి అడుగుపెట్టారు. అనంతరం ఆమె ‘మెంటల్‌ మదిలో’ చిత్రంతో టాలీవుడ్‌లోకి ప్రవేశించారు. ‘చిత్రలహరి’, ‘అల.. వైకుంఠపురములో..’, ‘రెడ్‌’ చిత్రాల్లో నివేదా నటన ప్రేక్షకుల్ని మెప్పించింది. ప్రస్తుతం ఆమె ‘విరాటపర్వం’, ‘పాగల్‌’ చిత్రాల్లో నటిస్తున్నారు.