Nora Fatehi: అసభ్యంగా ప్రవర్తించాడు.. అందుకే చెంప పగలగొట్టా: నోరా ఫతేహి

హైదరాబాద్‌: బాలీవుడ్‌తోపాటు తెలుగులోనూ పలు ఐటెమ్‌ సాంగ్‌లతో అలరించి గుర్తింపు తెచ్చుకుంది నోరా ఫతేహి (Nora Fatehi). టాలీవుడ్‌లో ‘బాహుబలి’ (Baahubali), ‘టెంపర్‌’, ‘కిక్‌2’ వంటి సినిమాల్లో తన డ్యాన్స్‌తో అభిమానులను సొంతం చేసుకుంది. సినీ ప్రియులు డ్యాన్సింగ్‌ క్వీన్‌ అని పిలుచుకునే ఈ ముద్దుగుమ్మ తన తొలిసినిమా షూటింగ్‌లో ఆమె కోస్టార్‌తో గొడవపడిందిట. తన జీవితంలో ఎదురైన ఆ చేదు అనుభవాన్ని నోరా ఫతేహి ఓ ఇంటర్వ్యూలో గుర్తుచేసుకుంది. ప్రస్తుతం ఆ వీడియో వైరల్‌గా మారడంతో.. పలువురు నెటిజన్లు దీనిపై కామెంట్స్‌ చేస్తున్నారు.

‘‘నా తొలి సినిమా ‘రోర్‌’ లోని కొన్ని సన్నివేశాలు బంగ్లాదేశ్‌లో చిత్రీకరించారు. అక్కడ సీన్‌లో నటిస్తోన్న నటుడు నాతో అసభ్యంగా ప్రవర్తించాడు. నాకు కోపం వచ్చింది. వెంటనే అతడి చెంప పగలగొట్టాను. దీంతో అతడు కూడా నాపై చేయిచేసుకున్నాడు. ఇద్దరం జుట్లు పట్టకు కొట్టుకున్నాం. సెట్‌లో అందరి ముందే మేము చాలా దారుణంగా ఘర్షణపడ్డాం. అప్పుడు దర్శకుడు జోక్యం చేసుకుని మాకు సర్థి చెప్పి.. మమ్మల్ని ఆపాడు’’ అని నోరా ఫతేహి తెలిపింది. 

2014లో వచ్చిన బాలీవుడ్‌ చిత్రం ‘రోర్‌: టైగర్స్‌ ఆఫ్‌ ది సుందర్‌బన్స్‌’ (Roar: Tigers of the Sundarbans) చిత్రంతో సినీరంగ ప్రవేశం చేసిన ఈ అమ్మడు ఆ తర్వాత బిగ్‌బాస్‌ షో ద్వారా బాగా పాపులారిటీ సంపాదించుకుంది. మోడల్‌గా, డ్యాన్సర్‌గా, సింగర్‌గా మాత్రమే కాదు.. నిర్మాతగానూ వ్యవహరించి తనొక మల్టీ టాలెంటెడ్‌ అనిపించుకుంది. ‘ఫిఫా’ (FIFA World Cup) థీమ్‌ సాంగ్‌లోనూ ఆమె డ్యాన్స్ చేయడం విశేషం.