Janhvi Kapoor: వాళ్లతో నటించడం కష్టం... ఎన్టీఆర్‌తో ఇష్టం: జాన్వీ కపూర్‌

ఇంటర్నెట్‌ డెస్క్‌: అనతి కాలంలోనే ప్రత్యేకమైన ఫేమ్‌ను సంపాదించుకున్న యువనటి జాన్వీ కపూర్ ‌(Janhvi Kapoor). ఉన్నది ఉన్నట్లు, సూటిగా మాట్లాడటం ఈ ముద్దుగుమ్మ నైజం. ఆ తరహాలోనే ఇటీవల ఓ ఇంటర్వ్యూలో తన ఇష్టాయిష్టాలను, భవిష్యత్‌ కోరికలను నిర్మొహమాటంగా ప్రేక్షకులతో పంచుకుంది. ‘షారుక్‌ఖాన్‌, సల్మాన్‌ఖాన్‌, అమీర్‌ఖాన్‌ వీరిలో ఎవరితో నటించడానికి మీరు ఇష్టపడతారు?’ అని అడిగిన ప్రశ్నకు... జాన్వీ ‘వాళ్లంతా సీనియర్‌ నటులు. వారికి, నాకు వయస్సులో చాలా తేడా ఉంది. అలాంటి జంటలను తెరపై చూడటానికి ప్రేక్షకులు ఒప్పుకోరు. కెమిస్ట్రీ కూడా కుదరదు. వయోభేదం ఎక్కువ ఉండటం వల్ల వారితో నటించడం నాకు ఇష్టం లేదు’ అని సమాధానమిచ్చింది. ఇక ‘మీ డ్రీమ్‌ హీరో ఎవరు?’అని అడిగిన ప్రశ్నకు ‘తెలుగు హీరో జూనియర్‌ ఎన్టీఆర్‌ ‌(Jr NTR)తో నటించడం నా డ్రీమ్‌’ అని బదులిచ్చింది. ఇంకా బాలీవుడ్‌లో రణ్‌బీర్‌కపూర్ ‌(Ranbir Kapoor), వరుణ్‌దావన్‌ (Varun Dhawan)లతో నటించాలనే కోరిక ఉందంటూ చెప్పుకొచ్చింది. జాన్వీ కపూర్‌ తాజా సినిమా ‘గుడ్‌లక్‌ జెర్రీ’ (Good Luck Jerry) ప్రస్తుతం డిస్నీ ప్లస్‌ హాట్‌స్టార్‌ (Disney+ Hotstar) వేదికగా ప్రసారమవుతోంది. ఈమె ప్రధాన పాత్రల్లో నటించిన ‘మిలి’(Mili), ‘మిస్టర్‌ అండ్ మిస్ట్రెస్‌ మహి’ (Mr And Mrs Mahi), ‘బవాల్’(Bawaal) చిత్రాలు నిర్మాణ దశలో ఉన్నాయి.