NTR 30: పవర్‌ఫుల్‌ టైటిల్‌తో వచ్చిన ఎన్టీఆర్‌.. అదిరిన మాస్‌ లుక్‌

ఇంటర్నెట్‌ డెస్క్‌: #NTR30 టైటిల్‌, ఫస్ట్‌లుక్‌ ఎప్పుడెప్పుడొస్తాయా? అని ఆసక్తి ఎదురుచూస్తున్న ఎన్టీఆర్‌ (NTR) అభిమానులకు చిత్ర బృందం ఆ కానుక అందించింది. హీరో పుట్టినరోజు (మే 20)ని పురస్కరించుకుని కొన్ని గంటల ముందే ఆ సర్‌ప్రైజ్‌ ఇచ్చింది. ఈ సినిమాకు ‘దేవర’ (Devara) అనే పవర్‌ఫుల్‌ పేరును ఖరారు చేసింది. ఈ మేరకు సోషల్‌ మీడియా వేదికగా పోస్టర్‌ విడుదల చేసింది. ఎన్టీఆర్‌ మాస్‌ అందరినీ ఆకట్టుకునేలా ఉంది. ఈ ప్రకటనకు ముందు.. ‘‘దేవర.. నేను రిజిస్ట్రేషన్‌ చేయించుకున్న టైటిల్‌. నేను మర్చిపోవడం వల్ల.. నా టైటిల్‌ను కొట్టేశారు’’ అంటూ నటుడు, నిర్మాత బండ్ల గణేశ్‌ ట్వీట్‌ పెట్టడం గమనార్హం. చిత్ర బృందం ఆ పెట్టినంత మాత్రాన తనకు సమస్య లేదని, టైగర్ కూడా తనకు దేవరతో సమానమని తెలిపారు.

సూపర్‌హిట్‌ చిత్రం తర్వాత ఎన్టీఆర్‌- కొరటాల శివ కలిసి పనిచేస్తుండడంతో #NTR30పై ఇప్పటికే  ప్రేక్షకుల్లో భారీ అంచనాలు నెలకొన్నాయి. హీరోయిన్‌గా జాన్వీకపూర్‌ (janhvi kapoor), ప్రతినాయకుడిగా ప్రముఖ హీరో సైఫ్‌ (saif alikhan) అలీఖాన్‌ నటిస్తుండడంతో ఈ సినిమా అందరి దృష్టిని ఆకర్షిస్తోంది. విస్మరణకు గురైన ఓ తీర ప్రాంత నేపథ్య కథతో ఈ చిత్రం తెరకెక్కుతోంది. భయమంటే ఏమిటో తెలియని అక్కడి మృగాళ్లకు భయాన్ని రుచి చూపించేందుకు కథానాయకుడు ఏం చేశాడన్నది ఆసక్తికరం. అనిరుధ్‌ స్వరాలందిస్తున్న ఈ భారీ బడ్జెట్‌ చిత్రం వచ్చే ఏడాది ఏప్రిల్‌ 5న ప్రేక్షకుల ముందుకు రానుంది.