NTR: మాస్‌ ‘దేవర’

‘ఆర్‌ఆర్‌ఆర్‌’ (RRR) చిత్రంలో విప్లవ వీరుడు కొమురం భీమ్‌గా సందడి చేసి సినీప్రియుల్ని మెప్పించారు కథానాయకుడు ఎన్టీఆర్‌ (NTR). ఇప్పుడాయన ‘దేవర’ (Devara)గా మరో కొత్త అవతారంలో మురిపించేందుకు సిద్ధమవుతున్నారు. ఎన్టీఆర్‌ - కొరటాల శివ కలయికలో తెరకెక్కుతున్న యాక్షన్‌ చిత్రమిది. ఎన్టీఆర్‌ ఆర్ట్స్‌, యువ సుధా ఆర్ట్స్‌ సంస్థలు సంయుక్తంగా నిర్మిస్తున్నాయి. జాన్వీ కపూర్‌ కథానాయిక. సైఫ్‌ అలీ ఖాన్‌ ప్రతినాయకుడిగా నటిస్తున్నారు. శనివారం ఎన్టీఆర్‌ పుట్టినరోజు. ఈ సందర్భంగా ఈ చిత్రానికి ‘దేవర’ అనే టైటిల్‌ను ఖరారు చేస్తూ ఫస్ట్‌లుక్‌ విడుదల చేశారు. ఆ పోస్టర్‌లో తారక్‌ శక్తిమంతమైన మాస్‌ గెటప్‌లో సముద్రంలో ఓ రాయిపై నుంచొని సీరియస్‌గా చూస్తూ కనిపించారు. ఓ చేతిలో నెత్తుటితో తడిచిన కత్తి ఉండగా.. చుట్టూ శత్రు మూకల శవాలు గుట్టలుగా పడి ఉండటం ఆసక్తిరేకెత్తిస్తోంది. విస్మరణకు గురైన ఓ తీర ప్రాంత నేపథ్యంలో సాగే కథతో రూపొందుతోన్న చిత్రమిది. అక్కడ ఉండే భయం తెలియని మృగాళ్లకు భయాన్ని పరిచయం చేసే శక్తిమంతమైన పాత్రలో తారక్‌ కనిపించనున్నారు. ప్రస్తుతం శరవేగంగా చిత్రీకరణ జరుపుకుంటోన్న ఈ పాన్‌ ఇండియా సినిమా వచ్చే ఏడాది ఏప్రిల్‌ 5న ప్రేక్షకుల ముందుకు రానుంది. ఈ చిత్రానికి అనిరుధ్‌ స్వరాలందిస్తున్నారు.