NTR: నష్టం వచ్చినా పర్వాలేదు!

ఇంటర్నెట్‌డెస్క్‌: అలనాటి నటుడు ఎన్.టి.రామారావు ఏదైనా అనుకున్నారంటే అది పూర్తయ్యే వరకూ నిద్రపోయే వారుకాదు. ఇక సినిమా విషయంలో ఆయన ఎంతో నిబద్ధతతో వ్యవహరించేవారు. పనిపట్ల ఆయనకు ఉన్న అంకితభావానికి దర్శక-నిర్మాతలే కాదు, తోటి నటీనటులు సైతం ఆశ్చర్యపోయేవారు. అందుకే ఆయన సెట్‌లో ఉన్నారంటే అంతా భయంతో వణికిపోయేవారు. జానపదం, పౌరాణికం, సాంఘికం ఇలా జోనర్‌ ఏదైనా ఆ పాత్రల్లో ఆయన పరకాయ ప్రవేశం చేస్తారు. ఇక ఏదైనా కొత్త పాత్ర చేయాలని సంకల్పిస్తే అస్సలు వెనకడుగు వేయరు. అలాంటిదే ఈ సంఘటన.

ఎన్టీఆర్‌ శ్రీనాథుడి కథను చిత్రంగా తియ్యాలనుకున్నారు. ఇదే విషయాన్ని బాపు-రమణల దృష్టికి తీసుకొచ్చారు. అప్పుడు వాళ్లు ‘‘శ్రీనాథుడి జీవితంలో పెద్ద కథేం ఉండదు. సామాన్యులకి ఆయన ఎవరో తెలియదు. అది సినిమా తియ్యడం అంటే, ఇబ్బందే! ఆర్థికంగా నష్టపోవాల్సి వస్తుందేమో!’’ అని అన్నారు. ‘‘ఏం పర్వాలేదు. నష్టం వచ్చినా నాకు ఇబ్బందిలేదు. మనం నిష్ఠగా కచ్చితమైన శ్రద్ధతో సినిమా తీద్దాం. ప్రజాదరణ పొందకపోయినా ఇబ్బంది లేదు. కొందరైనా ఆ సినిమా చూస్తారు. ఆ తృప్తిచాలు. ఏమైనా, శ్రీనాథుడి పాత్ర ధరించాలనేది నా కోరిక. అంతే’’ అని అన్నారట ఎన్‌.టి.ఆర్‌. ఆ తర్వాత బాపు దర్శకత్వంలో ఎన్టీఆర్‌, జయసుధ జంటగా ‘శ్రీనాథ కవి సార్వభౌముడు’ తెరకెక్కింది. కేవీ మహదేవన్‌ బాణీలు అందించారు.