Nupur Sanon: పండగకు శ్రీకారం

రవితేజ నటిస్తున్న తొలి పాన్‌ ఇండియా చిత్రం ‘టైగర్‌ నాగేశ్వరరావు’. వంశీ  దర్శకత్వం వహిస్తున్నారు. అభిషేక్‌ అగర్వాల్‌ నిర్మిస్తున్నారు. ఇప్పటికే అధికారికంగా ప్రకటించిన ఈ సినిమా.. ఉగాది సందర్భంగా ఏప్రిల్‌ 2న లాంఛనంగా ప్రారంభం కానుంది. అంతేకాదు అదే రోజు మధ్యాహ్ననం 12.06గంటలకు ఈ చిత్ర ప్రీలుక్‌ను విడుదల చేయనున్నారు. ఈ విషయాల్ని చిత్ర బృందం గురువారం సామాజిక మాధ్యమాల ద్వారా ప్రకటించింది. ‘‘1970వ దశకంలో దక్షిణ భారతదేశంలో ఎంతో పేరుమోసిన స్టూవర్టుపురం నాగేశ్వరరావు కథతో రూపొందుతోంది. ఈ సినిమాలో రవితేజ పూర్తి భిన్నమైన గెటప్‌లో కనిపించనున్నారు. ఆయన బాడీ లాంగ్వేజ్‌, సంభాషణలు పలికే తీరు కొత్తగా ఉంటాయి. ఈ పాత్ర కోసం    తన శరీరాకృతిని మార్చుకోనున్నారు రవితేజ.’’ అని సినీవర్గాలు తెలిపాయి. సంగీతం: జివి ప్రకాష్‌, మాటలు: శ్రీకాంత్‌ విస్సా, కళ: అవినాష్‌ కొల్లా, ఛాయాగ్రహణం: ఆర్‌ మదీ.

‘టైగర్‌..’కు జోడీగా..

‘టైగర్‌ నాగేశ్వరరావు’ చిత్రం కోసం రవితేజకు జోడీగా నూపూర్‌ సనన్‌ను ఎంపిక చేసింది చిత్ర బృందం. ఈ విషయాన్ని గురువారమే అధికారికంగా ప్రకటించారు. బాలీవుడ్‌ నాయిక కృతి సనన్‌ సోదరే నూపూర్‌. ఇప్పటికే అక్షయ్‌ కుమార్‌తో కలిసి ఓ మ్యూజిక్‌
వీడియోలో కనిపించిన ఈ అమ్మడు.. ఇప్పుడు రవితేజ సినిమాతో నాయికగా వెండితెరపైకి అడుగు పెట్టనుంది.