Sita Ramam: కథను మలుపు తిప్పిన పాట.. వీడియో చూశారా..!

హైదరాబాద్‌: దుల్కర్‌ సల్మాన్‌ - మృణాల్‌ ఠాకూర్‌ ప్రధాన పాత్రల్లో నటించిన ప్రేమకథా చిత్రం ‘సీతారామం’. హను రాఘవపూడి దర్శకుడు. గత నెలలో ప్రేక్షకుల ముందుకు వచ్చిన ఈ చిత్రం బాక్సాఫీస్‌ వద్ద మంచి వసూళ్లను రాబట్టి సూపర్‌హిట్టైంది. ఈ నేపథ్యంలో ‘సీతారామం’ నుంచి వీడియో సాంగ్స్‌ని చిత్రబృందం ఒక్కొక్కటిగా విడుదల చేస్తోంది. గురువారం ఉదయం తాజాగా ‘హే సీతా.. వదలనిక తోడవుతా’ పాట పూర్తి వీడియో షేర్‌ చేసింది. ఎస్పీ చరణ్‌ - రమ్య బెహరా ఆలపించిన ఈ పాట ప్రేక్షకాదరణ పొందిన సంగతి తెలిసిందే.

ఈ పాటతోనే సినిమా ఒక మలుపు తీసుకొంటుంది. అప్పటి వరకూ తన ప్రేమ గురించి కుటుంబ సభ్యులకు ఎలా చెప్పాలో తెలియక సతమతమవుతోన్న హీరోయిన్‌కు ఇందులో జరిగే ఓ సంఘటన సాయపడుతుంది. ఇక సినిమా విషయానికి వస్తే వైజయంతీ మూవీస్‌ పతాకంపై రూపుదిద్దుకున్న ఈ చిత్రంలో రష్మిక ముఖ్య భూమిక పోషించారు. సుమంత్‌, తరుణ్‌ భాస్కర్‌, వెన్నెల కిషోర్‌, ప్రియదర్శి కీలకపాత్రల్లో నటించి మెప్పించారు. ఇప్పటి వరకూ దక్షిణాదిలో అలరించిన ఈ సినిమా శుక్రవారం నుంచి హిందీ వారికీ చేరువ కానుంది. ఈ మేరకు గురువారం ‘సీతారామం’ హిందీ ట్రైలర్‌ ప్రేక్షకుల ముందుకు వచ్చింది.