Pathaan: ‘పఠాన్‌’ తొలి రోజే సెన్సేషన్‌.. కలెక్షన్‌ ఎంతంటే?

ఇంటర్నెట్‌ డెస్క్‌: షారుఖ్‌ ఖాన్‌ (Shah Rukh Khan) హీరోగా తెరకెక్కిన ‘పఠాన్‌’ (Pathaan) చిత్రం బాక్సాఫీసు వద్ద వసూళ్ల వర్షం కురిపిస్తోంది. విడుదలైన రోజే ప్రపంచ వ్యాప్తంగా రూ.106 కోట్లు (గ్రాస్‌) కలెక్ట్‌ చేసిందని చిత్ర నిర్మాణ సంస్థ యశ్‌రాజ్‌ ఫిల్మ్స్‌ వెల్లడించింది. ఓపెనింగ్‌ కలెక్షన్స్‌ ఈ స్థాయిలో రావడం హిందీ చలన చిత్ర పరిశ్రమలోనే ఇదే తొలిసారి అని తెలిపింది. ఈ చిత్రం ఇండియాలో రూ. 69 కోట్లు, ఓవర్సీస్‌లో రూ. 37 కోట్ల వ్యాపారం చేసింది. బాయ్‌కాట్‌ ట్రోల్స్‌ ఎదుర్కొన్న చిత్రం ఫస్ట్‌ డే ఇంత కలెక్ట్‌ చేయడం అసాధారణమైన విషయమని సినీ పండితులు అంటున్నారు. రెండో రోజూ అదే స్థాయిలో కలెక్ట్‌ చేస్తుందని అంచనా వేశారు. 

సిద్ధార్థ్‌ ఆనంద్‌ దర్శకత్వం వహించిన ఈ సినిమా జనవరి 25న విడుదలైంది. షారుఖ్‌తోపాటు దీపికా పదుకొణె, జాన్‌ అబ్రహంల నటన, విజువల్స్‌ ప్రేక్షకుల్ని విశేషంగా ఆకట్టుకుంటున్నాయి. ఓ పాటలో కనిపించే కథానాయిక డ్రెస్సు రంగును, కొన్ని మూమెంట్స్‌ను తప్పుపట్టిన కొందరు ఈ సినిమాని బాయ్‌కాట్‌ చేయాంటూ డిమాండ్‌ చేసిన సంగతి తెలిసిందే. అలాంటి విమర్శలు ఎదుర్కొన్నప్పటికీ అడ్వాన్స్‌ బుకింగ్స్‌లోనే ఔరా అనిపించిందీ చిత్రం. 2018లో వచ్చిన ‘జీరో’ తర్వాత షారుఖ్‌ సుమారు నాలుగేళ్లు విరామం తీసుకున్నా.. తొలి రోజే రూ. 100 కోట్ల క్లబ్‌లో చేరడం విశేషం.