Pathu Thala: ఓటీటీలో శింబు ‘పత్తుతలా’.. స్ట్రీమింగ్‌ ఎప్పుడంటే?

ఇంటర్నెట్‌డెస్క్‌: శింబు (simbu) కథానాయకుడిగా ఎన్‌.కృష్ణ దర్శకత్వంలో రూపొందిన యాక్షన్‌ థ్రిల్లర్‌ ‘పత్తు తలా’ (pathu thala ott release date). గౌతమ్‌ కార్తీక్‌, ప్రియా భవానీశంకర్‌, గౌతమ్‌ మేనన్‌ కీలక పాత్రలు పోషించారు. మార్చి 30న విడుదలైన ఈ సినిమా బాక్సాఫీస్‌ వద్ద మంచి టాక్‌నే తెచ్చుకుంది. అంతేకాదు, విమర్శకుల ప్రశంసలు సైతం అందుకుంది. ఇప్పుడు ఈ సినిమా అమెజాన్‌ ప్రైమ్‌ వీడియో, సింప్లీసౌత్‌ ఓటీటీ వేదికల్లో స్ట్రీమింగ్‌ అయ్యేందుకు సిద్ధమైంది. ఏప్రిల్‌ 27 నుంచి తమిళంలో ‘పత్తుతలా’ రెండు ఓటీటీల్లోనూ అందుబాటులోకి రానుంది. చిత్ర నిర్మాణ సంస్థ గ్రీన్‌ స్టూడియోస్‌ ఈ విషయాన్ని తెలియజేస్తూ పోస్టర్‌ను పంచుకుంది. కన్నడలో ఘన విజయం సాధించిన ‘మఫ్టీ’ రీమేక్‌గా ‘పత్తుతలా’ తెరకెక్కింది. మొత్తం మీద ఈ సినిమా దాదాపు రూ.50కోట్లకు పైగా వసూళ్లను రాబట్టింది. తమిళంలో విజయం సాధించిన సినిమాలను తెలుగులో విడుదల చేస్తుంటారు. అలా శింబు నటించిన ఒకట్రెండు సినిమాలు ఇక్కడ సందడి చేశాయి. కానీ, ఈ సినిమాను ఎందుకో తెలుగు ప్రేక్షకులకు అందుబాటులోకి తీసుకురాలేదు. ఓటీటీలోనూ కేవలం తమిళంలోనే స్ట్రీమింగ్‌ కానుంది.