Ponniyin Selvan: పొన్నియిన్‌ సెల్వన్‌: ఓటీటీ రైట్స్‌ అన్ని కోట్లా?

హైదరాబాద్‌: విక్రమ్‌, కార్తి, జయం రవి కీలక పాత్రల్లో మణిరత్నం దర్శకత్వంలో తెరకెక్కుతున్న ఎపిక్‌ పీరియాడిక్‌ యాక్షన్‌ ఫిల్మ్‌ ‘పొన్నియిన్‌ సెల్వన్‌’ (Ponniyin Selvan) . రెండు భాగాలుగా ప్రేక్షకుల ముందుకు రానున్న ఈ చిత్రం పార్ట్‌-1 సెప్టెంబరు 30న విడుదల కానుంది. చోళుల స్వర్ణయుగాన్ని ఈ చిత్రంతో సినీప్రియుల ముందుకు తీసుకొస్తున్నారు దర్శకుడు మణిరత్నం. ఇది ఆయన కలల చిత్రం. కల్కి కృష్ణమూర్తి రచించిన పొన్నియిన్‌ సెల్వన్‌ నవల ఆధారంగా రూపొందించారు. తాజాగా ఈ చిత్రం ఓటీటీ రైట్స్‌ అమెజాన్‌ ప్రైమ్‌ వీడియో భారీ ధరకు దక్కించుకున్నట్లు సమాచారం. అదే విధంగా డిజిటల్‌ రైట్స్‌ను కూడా పెద్ద మొత్తానికే విక్రయమైనట్లు తెలుస్తోంది. ‘పొన్నియిన్‌ సెల్వన్‌-1, 2’ ఓటీటీ రైట్స్‌ రూ.125 కోట్లకు  అమెజాన్‌ ప్రైమ్‌ కొనుగోలు చేయగా, డిజిటల్‌ రైట్స్‌ను సన్‌టీవీ దక్కించుకుంది. అయితే, ఎంతమొత్తానికి అన్నది తెలియరాలేదు. ఇక ఈ చిత్రంలో  ఐశ్వర్య రాయ్‌, త్రిష, ఐశ్వర్య లక్ష్మీ, శోభిత ధూళిపాళ తదితరులు ప్రధాన పాత్రల్లో నటించారు.  లైకా ప్రొడక్షన్స్‌, మద్రాస్‌ టాకీస్‌ సంస్థలు సంయుక్తంగా నిర్మిస్తున్నాయి. ఇటీవల విడుదల చేసిన ట్రైలర్‌ సినిమాపై అంచనాలను పెంచుతోంది.