Cinema News: నాగచైతన్యతో మరోసారి జోడీ కట్టనున్న పూజా!

హైదరాబాద్: టాలీవుడ్‌లో స్టార్‌హీరోయిన్‌గా దూసుకెళ్తోంది పూజా హెగ్డే. ప్రస్తుతం ఆమె ‘ఆచార్య’ చిత్రంలో రామ్‌చరణ్‌, తమిళ చిత్రం ‘బీస్ట్‌’లో విజయ్‌ సరసన నటిస్తున్న విషయం తెలిసిందే. తాజాగా ఆమె నాగచైతన్యతో కలిసి రెండోసారి నటించనున్నట్టు తెలుస్తోంది. ఇటీవల ఘన విజయం సాధించిన తమిళ చిత్రం ‘మానాడు’కి దర్శకత్వం వహించిన వెంకట్‌ ప్రభు.. నాగచైతన్యతో ఓ సినిమా ప్లాన్‌ చేశారు. ఆయనకు ఇదే తొలి తెలుగు సినిమా కావడం విశేషం. కాగా.. ఈ సినిమాలో హీరోయిన్‌గా పూజా హెగ్డేనే సూట్‌ అవుతుందని వెంకట్‌ ప్రభు భావిస్తున్నారట. ఈమేరకు ఆమెతో సంప్రదింపులు జరుపుతున్నారు. పూజా తొలి చిత్రం ‘ఒక లైలా కోసం’లో కథానాయకుడు నాగచైతన్యే కావడం, సక్సెస్‌ఫుల్‌ దర్శకుడిగా వెంకట్‌ప్రభుకు పేరు ఉండటంతో ఈ చిత్రంలో నటించేందుకు పూజా ఒప్పుకుంటుందని సినీ వర్గాలు చెప్పుకుంటున్నాయి. మరోవైపు ‘మానాడు’ చిత్రాన్నే నాగచైతన్యతో రీమేక్‌ చేస్తున్నారని, కాదు.. మరో కొత్త కథతో రాబోతున్నారని ఊహాగానాలు వినిపిస్తున్నాయి. మరి వీటిలో నిజమెంతో తెలియాలంటే.. చిత్రబృందం అధికారిక ప్రకటన ఇచ్చే వరకు వేచి చూడాల్సిందే.