Adipurush: ‘ఆదిపురుష్‌’ సంక్రాంతి బరిలో నుంచి వైదొలగనుందా..?

హైదరాబాద్‌: ప్రభాస్‌ (Prabhas) రాముడి పాత్రలో ఓం రౌత్‌ (Om Raut) రూపొందిస్తున్న మైథలాజికల్‌ మూవీ ‘ఆదిపురుష్‌’ (Adipurush). కృతిసనన్‌ సీతగా, సైఫ్‌ అలీ ఖాన్‌ లంకేష్‌గా నటిస్తున్నారు. పాన్‌ ఇండియా స్థాయిలో రానున్న ఈ సినిమా కోసం అందరూ ఎంతగానో ఎదురుచూస్తున్నారు. ఈ సినిమాను 2023 సంక్రాంతి కానుకగా అందించనున్నామని గతంలో మేకర్స్‌ చెప్పిన విషయం తెలిసిందే. తాజాగా ఈ చిత్రానికి సంబంధించిన ఓ వార్త ఫిల్మినగర్‌లో చక్కర్లు కొడుతోంది. ఈ సినిమా వాయిదా పడునుందని సంక్రాంతికి కాకుండా వేసవిలో విడుదల చేయడానికి చిత్రబృందం సన్నాహాలు చేస్తోందని టాక్‌.

మేకర్స్ నుంచి అధికారిక ప్రకటన ఇంకా రాలేదు కానీ, వాయిదా పడటం దాదాపు కన్ఫర్మ్‌ అయినట్లే అంటున్నారు. భారీ అంచనాల మధ్య తెరకెక్కుతున్న ఈ సినిమా టీజర్‌ ఇటీవల విడుదలై కొంతమందిని నిరాశపరిచింది. దీంతో, గ్రాఫిక్స్ వర్క్‌పై ఓం రౌత్ మరింత కసరత్తు చేస్తున్నట్టు కనిపిస్తోంది. వీఎఫ్‌ఎక్స్‌ విషయంలో రాజీపడితే సినిమా అంచనాలు దెబ్బతింటాయని అందుకే గ్రాఫిక్స్‌ విషయంలో దర్శక, నిర్మాతలు ఎక్కువ కృషి చేస్తున్నారట. ఈ సినిమా వాయిదా వెనక ఇది కూడా ఓ కారణమే అని గుసగుసలు వినిపిస్తున్నాయి. ఈ వాయిదా విషయంపై చిత్రబృందం ఇప్పటి వరకు ఎలాంటి ప్రకటన చేయలేదు.