NTR: ‘ఎన్టీఆర్‌ 30’.. పనులు చకచకా..

కథానాయకుడు ఎన్టీఆర్‌.. దర్శకుడు కొరటాల శివ కలయికలో ఓ పాన్‌ ఇండియా ప్రాజెక్ట్‌ పట్టాలెక్కనున్న సంగతి తెలిసిందే. ‘జనతా గ్యారేజ్‌’ వంటి హిట్‌ తర్వాత ఈ ఇద్దరి నుంచి వస్తున్న రెండో చిత్రమిది. మిక్కిలినేని సుధాకర్‌, హరికృష్ణ.కె సంయుక్తంగా నిర్మిస్తున్నారు. కల్యాణ్‌రామ్‌ సమర్పిస్తున్నారు. ఈ సినిమా త్వరలో సెట్స్‌పైకి వెళ్లనున్న నేపథ్యంలో పూర్వ నిర్మాణ పనుల్ని చకచకా పూర్తి చేస్తోంది చిత్ర బృందం. ప్రస్తుతం ఈ పనులకు సంబంధించే ప్రొడక్షన్‌ డిజైనర్‌ సాబు సిరిల్‌, ఛాయాగ్రాహకుడు రత్నవేలుతో కలిసి కొరటాల కసరత్తులు చేస్తున్నట్లు చిత్ర వర్గాలు తెలియజేశాయి. ఈ మేరకు ఈ ముగ్గురు కలిసి చర్చిస్తున్న ఫొటోలను ఆదివారం సామాజిక మాధ్యమాల ద్వారా పంచుకున్నారు. ‘‘ఎన్టీఆర్‌ అభిమానుల్ని, ప్రేక్షకుల్ని మెప్పించేలా ఓ శక్తిమంతమైన కథతో ఈ చిత్రం రూపొందనుంది. ఈ కథపై చిత్ర బృందమంతా నమ్మకంతో ఉంది. త్వరలో రెగ్యులర్‌ చిత్రీకరణ ప్రారంభం కానుంది’’ అని సినీవర్గాలు తెలిపాయి. సంగీతం: అనిరుధ్‌, కూర్పు: శ్రీకర్‌ప్రసాద్‌.