Priyanka Jawalkar: పవన్‌ కల్యాణ్‌ అంటే పిచ్చి: ప్రియాంక

హైదరాబాద్‌: టాలీవుడ్‌ హీరో విజయ్‌దేవరకొండ(Vijay Deverakonda) సరసన ‘ట్యాక్సీవాలా’(Taxiwaala) సినిమాలో నటించి క్రేజ్‌ను సొంతం చేసుకుంది ప్రియాంక జవాల్కర్‌(Priyanka Jawalkar).  ఆ తర్వాత తెలుగులో కొన్ని సినిమాల్లో నటించి అలరించింది. ఈ అమ్మడుకి పవన్‌ కల్యాణ్‌(Pawan Kalyan) అంటే ఎంత ఇష్టమో సందర్భం వచ్చినప్పుడల్లా చెబుతూనే ఉంటుంది. తాజాగా మరోసారి తన అభిమాన హీరో గురించి తెలిపింది. పవన్‌ కల్యాణ్‌ అంటే చచ్చేంత ఇష్టమని చెప్పింది. ఆయన నటించిన తమ్ముడు సినిమా 20 సార్లు చూసిందిట. అలాగే ఖుషి సినిమాలోని అన్ని డైలాగులు అలవోకగా చెప్పేస్తానని అంటోంది.

‘‘అంతపెద్ద స్టార్‌ అయినా కూడా అంత సింపుల్‌గా ఎలా ఉంటారో నాకు అర్థం కాదు. ఆయన్ని దూరం నుంచి చూస్తూ అభిమానిస్తాను కానీ, ఆయనతో కలిసి నటించే అవకాశం వచ్చినా నేను దానికి అంగీకరించను. ఆయనతో కలిసి సినిమా మాత్రం చేయలేను. ఇలా దూరం నుంచి చూస్తూ.. ఎప్పటికీ ఆయన్ని అభిమానిస్తూ ఉండిపోతా. ఈ జీవితానికి అది తప్ప మరొకటి అవసరం లేదు’’ అని చెప్పింది. ఇక షార్ట్‌ ఫిల్మ్‌తో తన కెరీర్‌ ప్రారంభించిన ప్రియాంక విజయ్‌ సరసన నటించిన సినిమాతో హీరోయిన్‌గా మారింది. ఆ తర్వాత ‘తిమ్మరుసు’, ‘ఎస్‌.ఆర్‌. కళ్యాణమండపం’, ‘గమనం’ వంటి సినిమాల్లో కనిపించింది. ఎప్పుడూ సోషల్‌మీడియాలో యాక్టివ్‌గా ఉండే ఈ ముద్దుగుమ్మకు లక్షల్లో ఫాలోయర్స్‌ ఉన్నారు.