Project K: ప్రభాస్‌ ‘ప్రాజెక్ట్‌-కె’లో కీలక మార్పు.. ఇప్పటివరకూ ఎంత షూట్‌ అయిందంటే!

హైదరాబాద్‌: ప్రభాస్‌ (Prabhas) కథానాయకుడిగా నాగ్‌ అశ్విన్‌ దర్శకత్వంలో తెరకెక్కుతున్న సైన్స్‌ ఫిక్షన్‌ మూవీ ‘ప్రాజెక్ట్‌-కె’ (వర్కింగ్‌ టైటిల్‌). దీపిక పదుకొణె (Deepika Padukone) కథానాయిక. అమితాబ్‌ (Amitabh Bachchan) కీలక పాత్రలో నటిస్తున్నారు. తాజాగా ఈ సినిమాకు సంబంధించి చిత్ర బృందం ఓ కీలక మార్పు చేసింది. తొలుత ‘ప్రాజెక్ట్‌-కె’ ప్రకటించినప్పుడు సంగీత దర్శకుడిగా మిక్కీ జె మేయర్‌ను అనుకున్నారు. ఇప్పుడు ఆయన స్థానంలో సంతోష్‌ నారాయణన్‌ వచ్చి చేరారు. ఈ విషయాన్ని చిత్ర నిర్మాత అశ్వనీదత్‌ (Ashwini Dutt) తాజాగా ఓ ఇంటర్వ్యూలో వెల్లడించారు. అంతేకాదు, సినిమాకు సంబంధించిన పలు ఆసక్తికర విషయాలనూ వెల్లడించారు.

‘ప్రాజెక్ట్‌-కె’ సైన్స్‌ ఫిక్షన్‌ జానర్‌ మూవీ అయినా ఎమోషన్స్‌, సెంటిమెంట్‌ కూడా ఉంటాయని అన్నారు. ఇప్పటివరకూ ఈ సినిమా చిత్రీకరణ 70శాతం పూర్తయినట్లు తెలిపారు. ప్రభాస్‌తో పాటు, దీపిక, అమితాబ్‌లకు కూడా స్క్రీన్‌ ప్రెజెన్స్‌ఎక్కువగా ఉంటుందన్నారు. చాలా సన్నివేశాల్లో ఈ ముగ్గురూ కనిపిస్తారని అన్నారు. ప్రేక్షకులు ఇప్పటివరకూ చెందని సరికొత్త అనుభూతిని ‘ప్రాజెక్ట్‌-కె’ ఇస్తుందని చెప్పారు. ఈ సినిమాకు సంబంధించిన గ్రాఫిక్స్‌ వర్క్‌ ఐదారు కంపెనీలు చేస్తున్నాయని, వాటిని తెరపై చూసినప్పుడు ‘న భూతో నభవిష్యతి’ అన్నట్లు ఉంటుందని తెలిపారు. వరుసగా తమిళ చిత్రాలు చేస్తున్న సంగీత దర్శకుడు సంతోష్‌ నారాయణన్‌ (Santhosh Narayanan) ‘ప్రాజెక్ట్‌-కె’లోకి రావడంతో సినిమాపై మరింత ఆసక్తి ఏర్పడింది. సంతోష్‌ నారాయణన్‌ పనిచేసిన చిత్రాల్లో నేపథ్య సంగీతం ఓ రేంజ్‌లో ఉంటుంది. ప్రస్తుతం ఆయన తెలుగులో నాని ‘దసరా’, వెంకటేశ్‌ ‘సైంధవ్‌’ చిత్రాలకు పనిచేస్తున్నారు.

ఇక శరవేగంగా చిత్రీకరణ జరుగుతోన్న ‘ప్రాజెక్ట్‌-కె’ వచ్చే ఏడాది సంక్రాంతి కానుకగా జనవరి 12న (project k release date) విడుదల చేయనున్నట్లు చిత్ర నిర్మాణ సంస్థ వైజయంతీ మూవీస్‌ ఇటీవల తెలిపింది. ఈ సినిమాకు సంబంధించి ప్రచార చిత్రాన్ని విడుదల చేసింది. ఇప్పటివరకూ ఎవరూ స్పృశించని కథతో.. అత్యాధునిక హంగులతో ఈ చిత్రాన్ని తెరకెక్కిస్తున్నారు దర్శకుడు నాగ్‌ అశ్విన్‌.