Aswini dutt: నిర్మాతల నిర్ణయమే నా నిర్ణయం.. వారికి మద్దతిస్తా: అశ్వినీదత్‌

హైదరాబాద్‌: చిత్ర పరిశ్రమ గురించి నిర్మాతలంతా కలిసి తీసుకునే నిర్ణయానికి తన సంపూర్ణ మద్దతు ఉంటుందని ప్రముఖ నిర్మాత అశ్వినీదత్‌ (Aswini Dutt) తెలిపారు. టాలీవుడ్‌లో నెలకొన్న పరిస్థితిపై తన అభిప్రాయం వ్యక్తం చేశారు. ‘‘యాభై ఏళ్లుగా చిత్ర‌సీమ‌లో నిర్మాత‌గా కొన‌సాగుతున్నా. నా తోటి నిర్మాత‌లంద‌రితోనూ చాలా స‌న్నిహితంగా, సోద‌రభావంతో మెలిగా. ఏ నిర్మాత‌పైనా నాకు అగౌర‌వం లేదు. గిల్డ్ అయినా, కౌన్సిల్ అయినా నిర్మాత‌లు, చిత్ర‌సీమ శ్రేయ‌స్సు కోస‌మే ఉద్భ‌వించాయి. ప‌రిశ్ర‌మ కోసం అంద‌రూ ఒక్క తాటిపై న‌డిచి, మంచి నిర్ణ‌యాలు తీసుకొంటే బాగుంటుంద‌ని నా అభిప్రాయం. నిర్మాత‌లంతా క‌లిసి చిత్ర‌సీమ గురించి ఏ మంచి నిర్ణ‌యం తీసుకొన్నా నా సంపూర్ణ‌ మ‌ద్ద‌తు ఉంటుంది’’ అని అశ్వినీదత్‌ తెలిపారు.

వైజయంతి మూవీస్‌ పతాకంపై తాను నిర్మించిన ‘సీతారామం’ సినిమా ప్రచారంలో భాగంగా అశ్వినీదత్‌ సంచలన వ్యాఖ్యలు తెలిసిన సంగతి తెలిసిందే. హీరోల పారితోషికాల వల్లే టికెట్‌ ధరలు పెంచారనేది అవాస్తవమని, గతంలో సమస్యలు వస్తే హీరోలు ఎవరూ రాలేదని, ప్రస్తుత నిర్మాతల్లో స్థిరత్వం లేదంటూ ఘాటు వ్యాఖ్యలు చేశారు.